Nagpur Results : निकालाचे काउंटडाउन सुरू... आता उरले 48 तास, उत्सुकता शिगेला; मतमोजणीसाठी प्रशासनाची तयारी अंतिम टप्प्यात

Nagpur News : नागपूर जिल्ह्यात नुकत्याच पार पडलेल्या नगरपरिषद व नगरपंचायतींच्या सार्वत्रिक निवडणुकांचे निकाल रविवारी (ता.21) जाहीर होण्याच्या पार्श्वभूमीवर राजकीय वातावरण तापले असून, सर्वांचे लक्ष आता मतमोजणीकडे लागले आहे. उच्च न्यायालयाच्या निर्देशानुसार जिल्ह्यातील सर्व नगरपरिषद व नगरपंचायतींसाठी रविवारी सकाळी 10 वाजल्यापासून मतमोजणी प्रक्रिया सुरू होणार आहे.

जिल्ह्यात 15 नगरपरिषदा व 12 नगरपंचायतींच्या निवडणुका शांततेत व सुरळीत पार पडल्या असून, आता मतमोजणीसाठी जिल्हा प्रशासन, निवडणूक यंत्रणा आणि पोलिस विभाग सज्ज झाले आहेत. प्रत्येक ठिकाणी मतमोजणी केंद्रांवर आवश्यक मनुष्यबळ, सुरक्षा व्यवस्था आणि तांत्रिक तयारी पूर्ण करण्यात आली आहे.

प्रशासनाची काटेकोर तयारी

जिल्हाधिकारी व निवडणूक निर्णय अधिकाऱ्यांच्या मार्गदर्शनाखाली प्रत्येक नगरपरिषद व नगरपंचायतीसाठी स्वतंत्र मतमोजणी केंद्र निश्चित करण्यात आले आहेत. मतमोजणीसाठी टेबलांची मांडणी, फेऱ्यांचे नियोजन, अधिकारी-कर्मचाऱ्यांची नेमणूक, तसेच उमेदवार व प्रतिनिधींसाठी ओळखपत्राची अट लागू करण्यात आली आहे. ओळखपत्राशिवाय कोणालाही मतमोजणी केंद्रात प्रवेश दिला जाणार नाही. मतमोजणी प्रक्रिया पारदर्शक, शांततेत व नियमबद्ध पार पडावी, यासाठी प्रशासनाकडून सर्व आवश्यक खबरदारी घेण्यात आली आहे.

पोलीस बंदोबस्त कडक

मतमोजणीच्या दिवशी कोणताही अनुचित प्रकार घडू नये, कायदा व सुव्यवस्थेचा प्रश्न निर्माण होऊ नये, यासाठी जिल्हा पोलिस अधीक्षकांच्या मार्गदर्शनाखाली कडक पोलिस बंदोबस्त तैनात करण्यात येणार आहे. संवेदनशील ठिकाणी अतिरिक्त पोलिस कुमक, दंगा नियंत्रण पथक तसेच गस्ती पथके तैनात राहणार आहेत. मतमोजणी केंद्र परिसरात जमावबंदी आदेश लागू करण्यात येणार असून, विजयी मिरवणुका, घोषणाबाजी व फटाक्यांवर निर्बंध ठेवण्यात आले आहेत. दरम्यान, सर्व राजकीय पक्ष, उमेदवार व नागरिकांनी संयम राखून प्रशासन व पोलिसांना सहकार्य करावे, असे आवाहन जिल्हा प्रशासन व पोलीस विभागाकडून करण्यात आले आहे.

सावनेर पालिकेच्या मतमोजणीसाठी प्रशासन सज्ज

सावनेर निवडणूक निर्णय अधिकारी अक्षय पोयाम व सहाय्यक निवडणूक निर्णय अधिकारी अर्शिया जुही यांनी दिलेल्या माहितीनुसार, मतमोजणीसाठी एकूण आठ टेबलांची व्यवस्था करण्यात आली आहे. मतमोजणी पाच फेऱ्यांमध्ये होणार असून, त्यासाठी सुमारे 30 ते 35 अधिकारी व कर्मचारी नियुक्त करण्यात आले आहेत. प्रत्येक उमेदवारास प्रत्येक बूथसाठी एक मतमोजणी प्रतिनिधी नेमण्याची मुभा देण्यात आली आहे. त्या अनुषंगाने संबंधित उमेदवारांनी आवश्यक कागदपत्रांसह नगरपरिषद सावनेर कार्यालयात उपस्थित राहून आपल्या मतमोजणी प्रतिनिधीचे ओळखपत्र तयार करून घ्यावे.

ओळखपत्राशिवाय कोणत्याही उमेदवार किंवा प्रतिनिधीस मतमोजणी स्थळी प्रवेश दिला जाणार नाही. दरम्यान, मतमोजणीच्या कालावधीत सर्व राजकीय पक्ष, उमेदवार व नागरिकांनी शांतता व शिस्त पाळावी. कोणताही अनुचित प्रकार घडू नये तसेच कायदा व सुव्यवस्थेचा प्रश्न निर्माण होणार नाही याची दक्षता घ्यावी, असे आवाहन निवडणूक निर्णय अधिकारी अक्षय पोयाम, सहाय्यक निवडणूक निर्णय अधिकारी अर्शिया जुही तसेच पोलिस निरीक्षक उमेश पाटील यांनी केले आहे.