Nagpur News: सरकारनं बिल थकवल्यानं आणखी एका कंत्राटदारानं संपवलं जीवन! महायुती सरकारसमोरच्या अडचणी वाढणार

Nagpur News: कंत्राटदारांच्या थकबाकीचा मुद्दा दिवसेंदिवस उग्र होत चालला आहे. एका युवा कंत्राटदाराने यापूर्वी आत्महत्या केली होती. आता नागपूरमधील एका हॉट-मिक्स कंत्राटदाराने सरकारनं थकवलेल्या बिलामुळं आत्महत्या केल्याची घटना समोर आली आहे. काही दिवसांच्या अंतरानं ही दुसरी घटना घडल्यानं मोठी खळबळ उडाली आहे.

मुन्ना वर्मा असे आत्महत्या केलेल्या कंत्राटदाराचे नाव आहे. राज्य सरकारकडून थकलेले देयके मिळत नसल्याने तो कर्जबाजारी झाला होता. यामुळे त्याने आत्महत्या केली असल्याचा दावा केला होता. यापूर्वी वर्धा जिल्ह्यातील एका शासकीय कंत्राटदाराने अंगावर पेट्रोल ओतून आत्महत्या करण्याचा प्रयत्न केला होता. उपमुख्यमंत्री व राज्याचे वित्तमंत्री अजित पवार वर्धा जिल्ह्याच्या दौऱ्यावर असताना त्यांनी कंत्राटदाराच्या आत्महत्येची दखल घेतली होती.

यापुढे कंत्राटदारांवर आत्महत्या करण्याची वेळ येणार नाही असे आश्वासन त्यांनी दिले होते. आम्ही कंत्राटदारांची थकबाकी देण्यासाठी आठ हजार कोटींची व्यवस्था केली आहे. त्यामुळे कंत्राटदारांनी आता निश्चिंत राहावे, आत्महत्येचे विचार डोक्यातून काढून टाकावे, एकाही कंत्राटादारेच बिल पेंडिंग राहणार नाही असा दावा त्यांनी केला होता. चार दिवसानंतर नागपूरमध्ये क कंत्राटदारांच्या असोसिएशनच्यावतीने थकबाकीसाठी भीक मांगो आंदोलन केले होते. तत्पूर्वी यापूर्वी थकबाकीसाठी राज्यभरातील कंत्राटदारांनी आंदोलन केले होते. प्रत्येक वेळ आश्वासने देऊन सरकार वेळ मारून नेत असल्याचा आरोप कंत्राटदारांना आहे.

लोकसभा आणि विधानसभेच्या निवडणुकीपूर्वी कोट्यवधीचे विकास कामे महायुती सरकारने जाहीर केले. कार्यादेश काढून कामांचे वाटप केले. सरकारकडून आज ना उद्या देयके मिळतील या आशेने कंत्राटदारांनी कामे केली. मात्र आता सरकारकडे पैसेच नाही असे सांगून हात वर केले जात असल्याचा आरोप कंत्राटदारांचा आहे. लाडकी बहिणीला पैसे देण्यासाठी विकास कामांचा पैसा वळता केला जात आहे. त्यामुळे कंत्राटदारांना वेठीस धरण्यात आले असल्याचा दावा केला जात आहे. कंत्राटदार मुन्ना वर्मा नागपूरच्या राजनगर परिसरातील रहिवासी आहे. सदर पोलिस ठाण्यात त्यांच्या आत्महत्येची नोंद करण्यात आली आहे.