Operation Sindoor : 'ऑपरेशन सिंदूर'विरोधात पोस्ट करणं अंगलट; प्राध्यापकाला अटक तर विद्यार्थिनीचं कॉलेजमधून निलंबन

Operation Sindoor : 'ऑपरेशन सिंदूर'नंतर संपूर्ण देशाने भारतीय लष्कराचं तोंडभरून कौतुक केलं. या ऑपरेशननंतर निष्पाप पर्यटकांची हत्या करणाऱ्या दहशतवाद्यांना भारतीय लष्कराने योग्य तो धडा शिकवल्याची भावना देशभरात निर्माण झाली आहे.

मात्र, दुसरीकडे काही देशद्रोह्यांनी या ऑपरेशननंतर समाजमाध्यमांद्वारे पाकिस्तानबद्दल आपुलकी व्यक्त करत पाकचं समर्थन करत आहेत. याबाबतची काही उदाहरणं आता समोर येऊ लागली आहेत. यामध्ये नागपुरमधील (Nagpur) रेझाझ सिद्दिक नावाच्या विद्यार्थीनीने 'ऑपरेशन सिंदूर' विरोधात सोशल मीडियावर पोस्ट केली आहे.

या वादग्रस्त पोस्टनंतर तिला निलंबित करण्यात आलं आहे. मात्र, या निलंबनाविरोधात आक्षेप घेत या तरूणीने मुंबई उच्च न्यायालयाच्या नागपूर खंडपीठात याचिका दाखल केली आहे. तर दुसरीकडे हरयाणाच्या सोनीपत येथील खासगी विद्यापीठाच्या एका प्राध्यापकाने देखील सोशल मीडियावर ऑपरेशन सिंदूर संदर्भात वादग्रस्त व्यक्तव्य केलं आहे.

त्यानंतर त्याला पोलिसांनी दिल्लीतून अटक केली आहे. अली खान महमूदाबाद असे अशोका विद्यापीठातील सहयोगी प्राध्यापकाचं नाव असून भाजप युवा मोर्चाच्या नेत्याच्या तक्रारीनंतरया प्राध्यापकावर कारवाई करण्यात आली.

तर दुसरीकडे रेझाझ सिद्दिक ही नागपुरातील सिम्बायोसिस विधी कॉलेजमध्ये एलएलबीच्या पाचव्या सत्रात शिक्षण घेत आहे. ती केरळची रहिवासी असून तिने ऑपरेशन सिंदूर संदर्भात एक वादग्रस्त पोस्ट शेअर केली होती. याबाबतची माहिती मिळताच पोलिसांनी तिला अटक केली.

तपासानंतर महाविद्यालय प्रशासनाने तिला तात्काळ निलंबित केलं आहे. मात्र, महाविद्यालयाने केलेल्या कारवाईवर आक्षेप घेत विद्यार्थिनीने न्यायालयात याचिका दाखल केली आहे. त्यानंतर न्यायालयाने 25 मेपर्यंत चौकशी पूर्ण करून 27 मे रोजी न्यायालयात अहवाल सादर करण्याचे निर्देश महाविद्यालयाला दिले आहेत.