Anil Deshmukh: अनिल देशमुखांवर 'तो' हल्ला झालाच नाही! नागपूर पोलिसांचा कोर्टात 'बी फायनल' रिपोर्ट सादर

Anil Deshmukh: विधानसभा निवडणुकीच्या प्रचारादरम्यान माजी गृहमंत्री अनिल देशमुख यांच्यावर हल्ला झालाच नव्हता असा अहवाल नागपूर ग्रामीण पोलिसांनी कोर्टात सादर केला आहे. 18 नोव्हेंबर 2024 रोजी अनिल देशमुख यांच्या कारवर प्रचार आटोपून नागपूरला परत येत असताना दगडफेक करुन हल्ला करण्यात आला होता.

याची तक्रार त्यांनी त्यावेळी पोलिसांत दिली होती. या हल्ल्यामध्ये देशमुखांच्या डोक्याला मार लागला होता, त्यांच्या डोक्यातून रक्त वाहत होतं ते थांबवण्यासाठी त्यांनी डोक्याला उपरणं बांधल्याचे फोटो त्यावेळी व्हायरल झाले होते.

या हल्ल्याची फॉरेन्सिक आणि तांत्रिक तपासणी केल्यानंतर तयार झालेला बी फायनल रिपोर्ट पोलिसांनी आज कोर्टात सादर केला. पोलिसांनी दिलेल्या रिपोर्टमध्ये FIRमध्ये दिलेला घटनाक्रम झाला नसल्याचा दावा करण्यात आला आहे. साम टीव्हीनं याबाबत वृत्त दिलं आहे.

अनिल देशमुखांच्या तक्रारीनंतर नागपूर पोलिसांनी या घटनेचा तपास करत पोलीस अधीक्षक हर्ष पोद्दार यांनी हा हल्ला कसा झाला होता? याचा तंत्रज्ञानाचा वापर करुन रिपोर्टही तयार केला होता. अनिल देशमुख यांना त्यावेळी नागपुरातील खाजगी रुग्णालयात भरती करण्यात आलं होतं त्यांच्या डोक्याला दुखापत झाल्याचं त्यावेळेस सांगण्यात आलं होत.

तत्कालीन पोलीस उपविभागीय अधिकारी यांची दोन दिवसांपूर्वीच बदली झाली, त्यांनीच हा अहवाल कोर्टाता सादर केल्याची खात्रीलायक सूत्रांकडून माहिती पुढे येत आहे.