Shinde ministers controversy: विरोधी पक्षनेत्याचे नाव सुचविणारे ते कोण? उद्धव ठाकरे यांनी शिंदेंच्या मंत्र्यांना सुनावले

Nagpur News : हिवाळी अधिवेशनापूर्वी काँग्रेस विधिमंडळ पक्षाचे नेते विजय वडेट्टीवारांनी स्वतंत्र विदर्भ राज्याचा मुद्दा उपस्थित करून या मागणीला पुन्हा हवा दिली तसेच भाजपची कोंडी करण्याचा प्रयत्न केला. त्यानंतर महसूलमंत्री चंद्रशेखर बावनकुळे आणि माजी भाजपचे ज्येष्ठ नेते सुधीर मुनगंटीवार यांनी वेगळ्या विदर्भाचा मुद्दा अजेंड्यावर असल्याचे जाहीर केले. त्यावरून आता पुन्हा जुंपली आहे.

उद्धव ठाकरे (Uddhav Thackeray) यांनी विजय वडेट्टीवारांची मागणी फेटाळून लावताना महाराष्ट्राचे तुकडे करायचे ही अखंड ठेवायचे हे भाजपने स्पष्ट करावे, असे आवाहन केले. त्यामुळे भाजपची अवस्था इकडे आड तिकडे विहीर अशी अवस्था झाली आहे. यावेळी त्यांनी विधानसभेच्या विरोधी पक्षनेत्यासाठी काँग्रेसच्या विजय वडेट्टीवारांचे नाव सुनावणाऱ्या मंत्र्याला ते आम्ही ठरवू तुम्हा नाही, अशा शब्दांत सुनावले.

उद्धव ठाकरे यांनी सुरुवातीलाच विदर्भ हा महाराष्ट्राचा आणि महाराष्ट्र हा विदर्भाचा असल्याचे स्पष्ट केले. त्यामुळे वेगळ्या विदर्भाची मागणी पूर्ण होऊ शकत नाही. आता महाराष्ट्र अखंड राहणार की तुकडे करणार, हे सरकारने स्पष्ट करावे. हिवाळी अधिवेशन विदर्भाच्या समस्या सोडवण्यासाठी प्रामुख्याने घेतले जाते. मात्र विदर्भासाठी ठोस निर्णय अथवा निधीची तरतूद या सरकारने केली नाही. महापालिका निवडणुका डोळ्यासमोर ठेवून मुंबईसह इतर महानगरपालिका क्षेत्रांसाठीच निधी जाहीर केला जात असल्याचे दिसून येते. याबाबत मुख्यमंत्र्यांचे सहकारी असलेल्या नगरविकास आणि अर्थमंत्र्यांनी उत्तर द्यावे, अशी मागणी त्यांनी केली.

महाराष्ट्राच्या इतिहासातले कदाचित हे पहिले अधिवेशन असेल, जिथे दोन्ही सभागृहाला विरोधी पक्षनेता नाही. तसे पाहिले तर विधानसभा निवडणुकीनंतर विधानसभा अध्यक्ष ॲड. राहुल नार्वेकर यांना भास्कर जाधवांच्या नावासह पत्र दिले होते. अद्यापही त्यावर निर्णय झालेला नाही. त्यानंतर विधानपरिषदेत विरोधीपक्षाचे पदही रिक्त झाले. त्यासाठी सभापती प्रा. राम शिंदे यांना पत्र दिले.

शुक्रवारी अध्यक्ष आणि सभापतींची भेटही घेतली. विरोधी पक्षनेतेपदावरील निर्णय लवकर घ्यावा, अशी मागणी आम्ही केली. त्यांनी लवकरच निर्णय घेऊ असे सांगितले. अधिवेशन संपण्यापूर्वी दोन्ही सभागृहाला विरोधी पक्षनेते लाभावे. विरोधी पक्षनेता कोणाला करायचे हे आम्ही ठरवू सत्ताधारी नाही, असे सांगून काँग्रेस (congress) नेत्याचे नाव सुचवणाऱ्या शिंदे सेनेच्या मंत्र्याला उद्धव ठाकरे यांनी सुनावले.