BJP MLC News : मुख्यमंत्र्यांच्या लाडक्या नेत्याची विधानपरिषदेची संधी हुकणार का ?

Nagpur News : नुकत्याच पार पडलेल्या विधानसभा निवडणुकीनंतर राज्यात चार महिन्यातच पुन्हा एकदा निवडणुका होत आहेत. महाराष्ट्र विधान परिषदेमधील रिक्त पाच जागांसाठी २७ मार्चला मतदान होणार असून, त्याच दिवशी संध्याकाळी निकाल जाहीर होणार आहे. विधान परिषदेतील भाजपचे तीन, राष्ट्रवादी काँग्रेस अजित पवार गट एक, तर एकनाथ शिंदेंच्या शिवसेनेच्या वाट्याला एक जागा येणार आहे.

महायुतीच्या (Mahayuti) वाट्याला आलेल्या या पाच जागेसाठी तीन पक्षात सध्या जोरदार रस्सीखेच पहावयास मिळत आहे. त्यातच आता विदर्भातील भाजपच्या रिक्त जागेवर मुख्यमंत्री देवेंद्र फडणवीस यांच्या लाडक्या नेत्याची वर्णी लागणार का ? याची उत्सुकता शिगेला पोहचली आहे.

विधानपरिषदेतील भाजपचे (Bjp) प्रवीण दटके, गोपीचंद पडळकर, रमेश कराड तर राष्ट्रवादी काँग्रेसचे राजेश विटेकर तर शिवसेना शिंदे गटाचे आमशा पाडवी यांच्या जागा रिक्त झाल्या आहेत. त्यामुळे या जागेवर वर्णी लागावी यासाठी तीन पक्षामध्ये चुरस आहे. राष्ट्रवादी काँग्रेसकडील एकाच जागेसाठी जवळपास 100 जण इच्छुक असल्याचे समजते.

दुसरीकडे आता भाजपच्या वाट्याला आलेल्या तीन जागासाठी अनेकजण इच्छुक आहेत. विदर्भातील मध्य नागपूर विधानसभा मतदारसंघातून प्रवीण दटके विजयी झाले आहेत. त्यामुळे या रिक्त झालेल्या जागेवर विदर्भातील एका नेत्याची वर्णी लागण्याची शक्यता आहे. या जागेसाठी मुख्यमंत्री देवेंद्र फडणवीस यांचे निकटवर्तीय आणि मानद सचिव संदीप जोशी यांना संधी मिळेल, अशी चर्चा रंगली होती. परंतु, भाजप श्रेष्ठींकडून माधव भंडारी, दादाराव केचे, अमरनाथ राजूरकर या तिघांची नावे निश्चित करण्यात आल्याची माहिती समोर येत आहे.

विदर्भातील एका जागेसाठी दादाराव केचे यांना संधी देण्यात आली तर तूर्तास जोशी यांची आमदार होण्याची शक्यता कमी आहे. सध्या विधानसभेतील संख्याबळ पाहता भाजपचे सर्वाधिक आमदार आहेत. त्यामुळे महायुतीचेच उमेदवार सहज विजयी होतील, असा अंदाज आहे. त्यामुळेच महायुतीकडे इच्छुकांचा ओढा अधिक आहे. त्यामुळे आता येत्या काळात या जागेवर कोणाची वर्णी लागणार याची उत्सुकता शिगेला पोहचली आहे.

(२५ वर्षे पूर्ण करणारा ई-सकाळ आता का्ॅमस्कोअरमध्ये नंबर १. डिजिटल माध्यमांच्या क्षेत्रातली नवी झेप)