पीएमसी बॅंक मी पाहिलीही नाही

मुंबई : शिवसेना नेते संजय राऊत (Sanjay Raut) यांनी आज शिवसेना भवनामध्ये पत्रकार परिषद घेतली. यात त्यांनी केंद्रातील भाजप सरकार, केंद्रातील भाजप (BJP) नेते, राज्यातील भाजप पक्ष आणि भाजपचे नेते यांच्यावर त्यांनी जोरदार हल्ला चढवला. या हल्ल्याची सुरुवात त्यांनी माजी खासदार किरीट सोमय्या यांच्यापासून केली. किरीट सोमय्या (Kirit Somaiya) हा मुलुंडचा दलाल आहे, भडवा आहे. तो मराठी भाषेच्या विरोधात कोर्टात गेला होता, असा आरोप करत त्यांनी किरीट सोमय्या यांना लक्ष्य केले.

महाविकास आघाडीतील नेत्यांवर भ्रष्टाचाराचे आरोप करणारे किरीट सोमय्या आज मुंबई भाजपचा चेहरा आहेत. पण त्यांना विचारा निकॉन इन्फ्रास्ट्रक्चर कंपनी कोणाची आहे. महाआयटीमध्ये २५ कोटींचा घोटाळा झाला. फडणवीसांच्या काळात सर्वात मोठा घोटाळा झाला. पीएमसी बॅंक घोटाळा. माझं त्या बॅंकेत खातंही नाही, ती बॅंक मी पाहिलीही नाही. माझ्याकडे पाच हजार कोटींचा घोटाळ्याचा हिशोब आहे. पण मला त्रास देण्यासाठी मला, माझ्या कुटुंबियांना, नातेवाईकांना त्रास दिला गेला.

निकॉन इन्फ्रास्ट्रक्चर कंपनी ही राकेश वाधवान ची आहे. जो किरीट सोमय्या यांचा मुलगा निल सोमय्यांचा पार्टनर आहे. पीएमसी बॅंक घोटाळ्याचे पैसे राकेश वाधवानच्या अकाऊंटला २० कोटी गेले. २० कोटींचा निधी भाजपला दिला. राकेश वाधवान यांचा किरीट सोमय्या आणि भाजपशी आर्थिक संबंध आहे. हा भ्रष्टाचाराविरु्ध लढणारा माणूस स्वतच भ्रष्टाचारी आहे. पण महाविकास आघाडीतील नेत्यांवर, ठाकरे कुटुंबियांवर, पवार कुटुंबियावर, त्यांच्या नातेवाईकांवर आरोप करायचे, त्यांना त्रास द्यायचा आणि आपला भ्रष्टाचार लपवायचा असे धंदे सुरु आहेत.

संजय राऊत म्हणाले, ठाकरे कुटुंबियांनी अलिबागजवळील कोरलाई गावात १९ बंगले बांधले आहेत, असा सोमय्यांनी आरोप केला. पण माझं सोमय्या दलालाला माझं आव्हान आहे, आपण सगळ्या पत्रकारांना घेवून त्या बंगाल्याची पिकनिक काढू आणि जर तिथं हे बंगले दिसले तर मी राजकारण सोडेन आणि नाही दिसले तर आख्खी शिवसेना त्या दलालाला चपलेने मारणार, असे आव्हान त्यांनी दिले. खोटेपणा, भंपकपणा, मराठी माणसाविषयीचा द्वेष यातून दिसतो, असेही ते म्हणाले.