Aaditya Thackeray Vs Deepak Kesarkar : गणवेशातील 'मलई'वरून ठाकरे-केसरकरांमध्ये जुंपली; एकमेकांची 'पुरती' काढली

Mumbai News : महायुती सरकारच्या 'एक राज्य, एक गणवेश', योजनेवरून आमदार आदित्य ठाकरे आणि आमदार दीपक केसरकर यांच्यात जुंपली आहे.

आरोप-प्रत्योरापातून एकमेकांविरुद्ध तोंडसुख घेत आहेत. तत्कालीन मुख्यमंत्री एकनाथ शिंदे यांच्या काळातील योजनेत दीपक केसरकर यांनी मलई खाल्ली, असा आरोप केला. तर ठाकरेंनी उपकार विसरू नये, असा इशारा केसरकरांनी दिला आहे.

तत्कालीन मुख्यमंत्री एकनाथ शिंदे (Eknath Shinde) यांच्या सरकारमध्ये 'एक राज्य, एक गणवेश', ही योजना सुरू केली होती. या योजनेत महायुती सरकारचे मुख्यमंत्री देवेंद्र फडणवीस यांनी काही बदल करत राबवत आहे. यावरून शिवसेना उद्धव बाळासाहेब ठाकरे पक्षातील युवा सेनाप्रमुख आमदार आदित्य ठाकरे आणि एकनाथ शिंदे यांच्या शिवसेनेचे आमदार दीपक केसरकर यांच्या आरोपांची जुगलबंदी रंगली आहे.

गेल्या वर्षी एकनाथ शिंदे यांच्या सरकारने या योजनेत राज्यातील बचतगटांना गणवेश तयार करण्याचे काम दिले होते. पण गणवेश निकृष्ट दर्जाचे शिवले गेले. यावरून राज्यात विरोधकांनी सत्ताधाऱ्यांविरोधात चांगलाच गदारोळ घातला. यावेळी मुख्यमंत्री देवेंद्र फडणवीस यांनी या योजनेत बदल केला आहे. यावरून आमदार आदित्य ठाकरे (Aaditya Thackeray) यांनी तत्कालीन शिक्षणमंत्री दीपक केसरकर यांच्यावर निशाणा साधला.

आदित्य ठाकरे म्हणाले, "'एक राज्य एक गणवेश', ही योजना गतवर्षी राबवली गेली होती. यातील निकृष्टतेची चौकशी होणार का? दीपक केसरकर यांनी विद्यार्थ्यांचा शालेय गणवेश देखील सोडला नाही". त्यात देखील मलई खाण्याचा प्रयत्न केला. त्यांची चौकशी गरजेची आहे, असा टोला लगावला.

दीपक केसरकर यांनी आदित्य ठाकरेंनी जोरदार प्रत्युत्तर दिले. "गणवेशाचे कंत्राट 138 कोटीचे होते. ते 11 कोटी रुपये कमी करून घेण्यात आले. आदित्य ठाकरेंनी माझ्यावर आरोप करताना विचारपूर्वक करावेत. आज जी काही शिवसेनेची परिस्थिती झाली आहे, त्याचा आदित्य ठाकरेंचा स्वभाव जबाबदार आहे. आदित्य ठाकरेंनी वडिलांवर दबाव आणून काँग्रेसबरोबर जायला लावले", असा घणाघात दीपक केसरकर यांनी केला.