आर्यन खानला जामीन मिळाल्यानंतर नवाब मलिक म्हणाले..

मुंबई: क्रुझ ड्रग्ज प्रकरणात आज (ता.28 ऑक्टोबर) आर्यन खानला (Aryan Khan) मुंबई उच्च न्यायालयाकडून (Mumbai High Court) जामीन मंजूर झाला. त्यानंतर राष्ट्रवादी काँग्रेसचे (NCP) नेते व अल्पसंख्यांक मंत्री नवाब मलिक (Nawab Malik) यांनी ट्विट करत 'पिक्चर अभी बाकी है मेरे दोस्त' अशी एका वाक्यात सुचक अशी प्रतिक्रिया दिली आहे.

आर्यन खान, अरबाज मर्चंट आणि मुनमुन धमेचा या तिघांना आज जामीन मंजूर झाला आहे. या सर्वांना मुंबई क्रुझ ड्रग्ज प्रकरणात ३ ऑक्टोबरला सकाळी एनसीबीने (NCB) ताब्यात घेतले होते. अटकेनंतर तिघांनाही २५ दिवसानंतर जामीन मिळाला आहे. आर्यन खान प्रकरण व क्रुज ड्रग्ज पार्टी प्रकरणी अमली पदार्थ नियंत्रण विभागाचे (एनसीबी) विभागीय संचालक समीर वानखेडे (Sameer Wankhede) यांच्या तपासावर प्रश्नचिन्ह उपस्थित करणाऱ्या मलिक यांनी आर्यनला जामीन मिळल्यानंतर फिल्मी स्टाइलमध्ये ट्विटरवरुन सुचक प्रतिक्रिया दिली आहे. आज आर्यनला पाच वाजताच्या सुमारास जामीन मंजूर झाल्यानंतर मलिक यांनी लगेचच 'पिक्चर अभी बाकी है मेरे दोस्त' असं ट्विट केले.

दरम्यान, वानखेडे यांनी मुस्लिम असल्याची माहीती लपवून चुकीच्या पद्धतीने कागदपत्रांचा वापर करुन नोकरी मिळवल्याचा दावा मंत्री मलिक यांनी केला आहे. यावर वानखेडे यांनी हे आरोप फेटाळत याबाबतचे उत्तर आपण न्यायालयातच देऊ असे म्हटले आहे. मात्र, आज आर्यनला जामीन मिळाल्यावर केलेल्या ट्विटरवरुन मलिक आणि वानखेडे यांचा वाद थांबणार नसुन वाढतच जाणार असल्याचे दिसत आहे.