Teachers Agitation: विनाअनुदानित शिक्षकांच्या लढ्याला अखेर यश! 'या' तारखेला खात्यात जमा होणार पगार

Teachers Agitation Succeed : मुंबईच्या आझाद मैदानात गेल्या चार दिवसांपासून विनाअनुदानित शिक्षकांचं पगारासंबंधीच्या मागणीसाठी आंदोलन सुरु आहे. या आंदोलनाला अखेर आज यश आलं. या शिक्षकांच्या मागणी सरकारनं मान्य केल्याची घोषणा यावेळी सरकारचे प्रतिनिधी म्हणून मंत्री गिरिश महाजन यांनी केली. आंदोलनस्थळी उपस्थितीतांची भेट घेतल्यानंतर त्यांनी हा निर्णय जाहीर केला.

'या' तारखेला पगार खात्यात जमा होणार

महाजन म्हणाले, "आमची जी भूमिका आहे ती सकारात्मक आहे. मुख्यमंत्री देवेंद्र फडणवीस आणि सरकारला तुमची काळजी आहे. आम्हाला माहिती आहे की, आपण सामान्य कुटुंबातील आहात. तुमची रोजीरोटी ही आहे. त्यामुळं अतिशय धाडसी निर्णय फडणवीसांनी त्यावेळी घेतला. त्यानुसार, २० टक्के, ४० टक्के त्यानंतर ६० टक्के दिले. सरकारी तिजोरीवरील आर्थिक संकटामुळं आमच्याकडून पुढचे टप्पे देण्यास उशीर झालेला आहे. तुम्ही याबाबत वारंवार मागणी करत होता. पण आता तुमचा पगारा प्रश्न मार्गी लागलेला आहे.

तुमच्या शिक्षकांच्या संघटनेच्या पदाधिकाऱ्यांसोबत झालेल्या बैठकीत हे ठरलं की, आम्हाला तुमच्या खात्यात पगार टाकायचाच आहे. पण या दोन-तीन दिवसात सर्व तांत्रिक बाजू समजावून घेऊन येत्या १८ तारखेला अधिवेशन संपेल तेव्हा तुमच्या खात्यात पैसे पडलेले असतील. यात कोणताही बदल होणार नाही"

महाजन पुढे म्हणाले, मुख्यमंत्र्यांचा हा शब्द आहे, त्यांनी सांगितलं की, मी कुठुनही काढेन, काहीही करेन पण तुमच्या खात्यात केवळ एका महिन्यापुरता नाही तर हा पगार आता शेवटपर्यंत नियमितपणे मिळेल. ठरलेल्या टप्प्याप्रमाणं जो काही पगार असेल तो तुमच्या खात्यात जमा केला जाईल"