Manikrao Kokate: माणिकराव कोकाटेंचा राजीनामा अजित पवारांनी स्विकारला; लवकरच मोठी घडामोड घडणार!

Manikrao Kokate: क्रीडा व युवक कल्याण मंत्री माणिकराव कोकाटे यांनी आपल्या मंत्रीपदाचा राजीनामा दिला असून हा राजीनामा उपमुख्यमंत्री आणि राष्ट्रवादी काँग्रेसचे प्रमुख अजित पवार यांनी तत्वतः स्विकारला आहे. यामुळं आता महत्वाच्या घडामोडी घडण्याची शक्यता आहे. कोकाटेंना दोन वर्षांची शिक्षा झाल्यानं त्यांच्याविरोधात अटक वॉरंटही निघालं आहे.

अजित पवारांनी केलं ट्विट

अजित पवारांनी यासंदर्भत ट्विट केलं असून यामध्ये दोन कागदपत्रे जोडली आहेत. यांपैकी एक कोकाटेंनी दिलेल्या राजीनाम्याचं पत्र आणि मुख्यमंत्री देवेंद्र फडणवीस यांच्याकडं हा राजीनामा स्विकारण्यासाठी पाठवल्याचं दुसरं पत्र यांचा समावेश आहे. या दोन्ही पत्रांसोबत अजित पवारांनी या विषयाबाबत माहितीही पोस्ट केली आहे.

राजीनामा तत्वतः स्विकारला

या पोस्टमध्ये अजित पवार म्हणतात, "माननीय न्यायालयाच्या निकालानंतर महाराष्ट्राच्या मंत्रिमंडळातील सदस्य व पक्षातील आमचे सहकारी माणिकराव कोकाटे यांनी आपला राजीनामा माझ्याकडे सुपूर्द केला आहे. कायदे-नियम हे सर्वोच्च स्थानी असून ते कोणत्याही व्यक्तीपेक्षा सर्वोतोपरी आहेत, या आमच्या पक्षाच्या दीर्घकालीन भूमिकेनुसार हा राजीनामा तत्त्वतः स्वीकारण्यात आला आहे.

मुख्यमंत्र्यांकडं पाठवला

संवैधानिक प्रक्रियेनुसार पुढील कार्यवाहीसाठी माणिकराव कोकाटे यांचा राजीनामा मुख्यमंत्री महोदयांकडे पाठवण्यात आला आहे. सार्वजनिक जीवन हे नेहमीच संविधानिक नैतिकता, संस्थात्मक प्रामाणिकता आणि न्यायपालिकेच्या सन्मानावर आधारित असावं, या मुल्यांवर आमच्या पक्षाची निरंतर वाटचाल राहिली आहे. कायदेशीर प्रक्रियेवर आमचा ठाम विश्वास आहे. राज्यात कायदा-व्यवस्थेचं काटेकोरपणे पालन होईल, याकरिता आम्ही कटिबद्ध आहोत. लोकशाही मुल्ये जपली जातील व जनतेच्या विश्वासाला तडा जाणार नाही, त्या दृष्टीकोनातून आम्ही सदैव कार्यतत्पर राहू, असंही अजित पवारांनी पुढे म्हटलं आहे.