Ajit Pawar News : विधान परिषदेच्या विरोधी पक्षनेतेपदावर दावा सांगणार का? अजित पवार म्हणाले...

Uddhav Thackeray News : विधान परिषदेच्या आमदार मनीषा कायंदे यांनी रविवारी (१८ जून) शिवसेना (शिंदे गटात) प्रवेश केला. त्यामुळे विधान परिषदेचे ठाकरे गटाचे संख्याबळ एकने कमी झाले आहे. यावर विधानसभेचे विरोधी पक्षनेते अजित पवार यांनी भाष्य केले.

विधान परिषदेत ठाकरे गटाकडे १० आमदार होते. त्यामुळे टाकरे गटाकडे विधान परिषदेचे विरोधी पक्षनेते पद आहे. ठाकरे गटाचे नेते अंबादास दानवे सध्या विधान परिषदेचे विरोधी पक्षनेते आहेत. मात्र, कायंदे यांनी शिंदे गटात प्रवेश केल्यामुळे ठाकरे गटाची संख्या कमी झाली आहे. त्यावरुन अजित पवार यांना प्रश्न विचारण्यात आला होता, राष्ट्रवादी काँग्रेस पक्ष विधान परिषदेच्या विरोधी पक्षनेतेपदावर दावा करणार का? यावर अजित पवार स्मितहास्य करत म्हणाले, तुम्ही हे आमच्या लक्षात आणून दिल्यामुळे आम्ही यावर विचार करू.

अजित पवार (Ajit Pawar) म्हणाले, आमची बैठक आधीच ठरली आहे. जयंत पाटील आणि मी आधीच ती ठरवली आहे. या बैठकीचा व विधान परिषदेच्या विरोधी पक्षनेतेपदाचा संबंध नाही. राष्ट्रवादीच्या वर्धापन दिनानिमित्त आम्ही ९ जूनला जी सभा घेणार होतो, ती पावसामुळे रद्द झाली. ती निमंत्रितांची सभा २१ जूनला आहे. स्वतः शरद पवारसाहेबांनी ती सभा ठेवली आहे.

अजित पवार म्हणाले, आमची महाविकास आघाडी आहे. लगेच बातम्या चालवू नका. विधानसभा, विधान परिषदेत ज्या वेळेस विरोधी पक्षनेतेपद देण्याची वेळ येते त्यावेळी ज्यांच्या सर्वाधिक जागा त्यांना ते दिले जाते. २०१४ च्या विधानसभा निवडणुकीनंतर आम्ही ४१ आमदार होतो, काँग्रेसचे ४२ आमदार होते. तरीदेखील ५ वर्ष ते पद काँग्रेसकडे होते.

दरम्यान, विधान परिषदेत ठाकरे गटाकडे १० तर शिंदे गटाकडे एकच आमदार होता. राष्ट्रवादी काँग्रेस पक्षाकडे ९ आमदार आहेत. दरम्यान, कायंदे यांनी ठाकरे गटाला रामराम केल्यामुळे विधान परिषदेत ठाकरे गट आणि राष्ट्रवादी काँग्रेस (NCP) या दोन्ही पक्षांकडे प्रत्येकी ९ आमदार राहिले आहेत. तर काँग्रेसकडे (Congress) ८ जागा आहेत.