आनंदराव अडसूळांची तब्येत बिघडली; रुग्णालयात दाखल

मुंबई : शिवसेनेचे माजी खासदार आनंदराव अडसूळ (Anandrao Adsul) यांना ईडीने (ED) आज (ता. २७ सप्टेंबर) समन्स पाठवले होते. त्यानंतर चौकशीसाठी ईडीचे अधिकारीही त्यांच्या घरी दाखल झाले होते. चौकशीनंतर ईडीच्या अधिकाऱ्यांनी त्यांना ताब्यात घेतल्याचे सांगितले जात होते. मात्र, अचानक अडसूळ यांची तब्येत बिघडली. त्यामुळे त्यांच्या घरी तातडीने अॅम्ब्युलन्स बोलाविण्यात आली. त्यांना गोरेगावच्या लाईफ केअर हॉस्पिटलमध्ये नेण्यात येत असल्याची माहिती आहे.

दरम्यान, सीटी बँकेमध्ये कामगार, पेंशनधारक, अशा लोकांची खाती होती. बॅंकेचे जवळपास ९ हजार खातेधारक होते. त्या खातेदारांचे पैसे अवैधरित्या बिल्डरांना वाटण्यात आले. त्यात अडसूळ यांनी २० टक्के कमिशन घेतले. त्यामुळे बँक बुडाली. यामध्ये जवळपास ९८० कोटींचा घोटाळा झाला, असल्याचा आरोप त्यांच्यावर आहे. या प्रकरणात दोन वर्षांपूर्वी एफआयआर झाले आहेत. मुख्यमंत्री शिवसेनेचा असल्यामुळे ही चौकशी झाली नाही, असा आरोप आमदार रवी राणा यांनी केला आहे. त्यानंतर अडसूळ यांना ईडीने चौकशीला हजर राहण्या संदर्भात समन्स बजावले आहे.

दरम्यान, अडसूळ यांनी खासदार नवनीत राणा यांच्या खोट्या जातपडताळणी प्रमाणपत्राचा आरोप केला होता. उच्च न्यायालयाने देखील अडसूळ यांच्या बाजूने निकाल दिला होता. त्यानंतर राणा यांनी सर्वोच्च न्यायालयात दाद मागितली होती. सर्वोच्च न्यायालयात सुनावणी सुरू असतानाच ईडीकडून पहिले समन्स बजाविण्यात आले होते, असा आरोप अभिजीत अडसूळ यांनी केला. राणा दाम्पत्याचे वरपर्यंत संबंध आहे. त्यामुळे ईडीकडून चौकशी केली जात असल्याचा आरोप अभिजीत यांनी केला आहे.

आनंदराव अडसूळ यांनी आरोप फेटाळले

सीटी बँकेत ९८० कोटींचा घोटाळा झाल्याचा आरोप आनंदराव अडसूळ यांनी फेटाळून लावला आहे. बँकेत ८०० कोटींची उलाढाल होती. मग, ९८० कोटींचा घोटाळा कसा काय होऊ शकतो, असा सवाल त्यांनी केला. सकाळीच ईडीचे अधिकारी माझ्या घरी आले होते. त्यांनी मला चौकशीसाठी हजर राहण्याचे आदेश दिल्याचे अडसूळ यांनी सांगितले आहे.