Anjali Damania : राष्ट्रवादी नेत्याच्या ‘त्या’ पोस्टनंतर दमानिया यांना संताप अनावर; म्हणाल्या, ‘जीवाची पर्वा न करता लढणाऱ्यांचा असा छळ करणार का?’

Mumbai, 21 February : राष्ट्रवादी काँग्रेसचे मंत्री धनंजय मुंडे यांच्या राजीनाम्यासाठी आक्रमक भूमिका घेणाऱ्या सामाजिक कार्यकर्त्या अंजली दमानिया यांच्यावर राष्ट्रवादी युवक काँग्रेसचे प्रदेशाध्यक्ष सूरज चव्हाण यांनी गंभीर आरोप केले आहेत. धनंजय मुंडेंवर आरोप करण्यासाठी ‘रिचार्जवाल्या’ ताईच्या खात्यावर 25 खोक्याचा बॅलन्स टाकण्यात आला आहे, असा दावा चव्हाण यांनी केला आहे. त्याला दमानिया यांनी उत्तर देताना ‘खूप राग आला आहे, तरीही मी माझ्या भाषेची पातळी सोडणार नाही,’ असे सांगताना थेट फडणवीस आणि अजित पवारांना आवाहन केले आहे.

मस्साजोगचे सरपंच संतोष देशमुख यांच्या खूनप्रकरणी अंजली दमानिया यांनी वाल्मिक कराड आणि त्याच्या माध्यमातून मंत्री धनंजय मुंडे (Dhananjay Munde) यांच्यावर आरोपाच्या फैरी झाडत आहेत. देशमुख खूनप्रकरणी धनंजय मुंडे यांच्या राजीनाम्यावर दमानिया या ठाम आहेत. वेगवेगळ्या मुद्यांच्या आधारे दमानिया यांच्याकडून मुंडे यांना कोंडीत पकडण्याचे प्रयत्न सुरू आहेत.

धनंजय मुंडे यांच्यावर आरोप करणाऱ्या अंजली दमानिया (Anjali Damania) यांच्यावरही राष्ट्रवादी काँग्रेसकडून प्रहार केले जात आहेत. पक्षाचे युवक प्रदेशाध्यक्ष सूरज चव्हाण यांनी एक्स पोस्टच्या माध्यमातून त्यांना ‘रिचार्जवाल्या ताई’ म्हणून टीका करण्यास सुरुवात केली आहे. त्यालाही दमानिया यांनी एक्स पोस्टच्या माध्यमातून प्रत्युतर दिले आहे. त्या म्हणाल्या, ‘खूप राग आला आहे, तरीही मी माझ्या भाषेची पातळी सोडणार नाही.’

पोस्टमध्ये दमानिया यांनी म्हटले आहे, आज महाराष्ट्राचे मुख्यमंत्री देवेंद्र फडणवीस, उपमुख्यमंत्री अजित पवारांना माझा थेट आवाहन आहे. ताबडतोब माझी सगळीच्या सगळ्या खाती सरकारने तपासावीत. कुठेही एक दमडीदेखील unaccounted आहे का ते पाहावे. इतका अमाप भ्रष्टाचार होतोय आणि मी लढू नये? स्वतःच्या जीवाची पर्वा ना करता लढणाऱ्या लोकांचा असा मानसिक छळ करणार?

राजकारणात पुढे जाण्यासाठी, नेत्याला खुश करण्यासाठी खालच्या पातळीला जाऊन हे बोलतात ना? योग्य आहे हे? जर महाराष्ट्राच्या मीडियाला माझ्या लढ्याबद्दल जरा पण आदर असेल तर अजित पवार आणि देवेंद्र फडणवीस यांची ह्यावर आजच्या आज प्रतिक्रिया घ्यावी, असे आवाहन दमानिया यांनी माध्यमांनाही केले आहे.

अंजली दमानिया म्हणाल्या, मुख्यमंत्री आणि उपमुख्यमंत्री दोघांही माझी विनंती आहे. माझी ताबडतोब चौकशी करावी. माझ्या सगळ्या खात्यांची ताबडतोब चौकशी करावी. होऊन जाऊ दे. मी भ्रष्ट असेन तर मला शिक्षा झाली पाहिजे आणि जर नसेल तर मग ह्या सूरज चव्हाणला योग्य ती शिक्षा द्यावी, असेही दमानिया यांनी म्हटले आहे.

सूरज चव्हाण यांनी काय आरोप केले होते?

धनंजय मुंडे यांच्यावर आरोप करण्यासाठी ‘रिचार्जवाल्या’ ताईच्या खात्यावर 25 खोक्याचा बॅलन्स टाकण्यात आला आहे. काहीही काम न करता वर्षाला पंधरा देश फिरणाऱ्या अडीच कोटी टॅक्स भरणाऱ्या ‘स्वयंघोषित’ समाजसेविका ताई कोणाच्या माध्यमातून तुमचा रिचार्ज झाला पुराव्यासह ....लवकरच, असा आरोप राष्ट्रवादी काँग्रेसचे युवक प्रदेशाध्यक्ष सूरज चव्हाण यांली केला आहे.