Raj Thackeray : 'बाळासाहेबांनी हिंदूंकडे व्होटबँक म्हणून पाहिलं नाही...', राज ठाकरेंनी 'त्या' पक्षांना सुनावलं

Raj Thackeray News : बाळासाहेब ठाकरे यांच्या स्मृतीदिना निमित्त उद्धव ठाकरे, राज ठाकरे हे एका मंचावर आले. शिवाजी पार्क येथील बाळासाहेब ठाकरे यांच्या स्मृतीस्थळाला त्यांनी अभिवादन केले. दरम्यान, राज ठाकरे यांनी सोशल मीडियावर पोस्ट करत बाळासाहेबांच्या हिंदुत्वावरून हिंदुत्वाचे राजकारण करणाऱ्या पक्षांना सुनावले आहे.

राज ठाकरे म्हणाले की, 'शिवसेना पक्षाचे संस्थापक, हिंदुहृदयसम्राट आणि माझे काका स्व. बाळासाहेब ठाकरे यांची आज पुण्यतिथी. देशाच्या इतिहासात भाषिक अस्मितेच्या जोरावर एक प्रचंड चळवळ निर्माण करून त्यातून एका राजकीय पक्षाला जन्म देणारे बाळासाहेब. आणि पुढे जातीय अस्मिता तीव्र होण्याच्या काळात आणि भारतीय जनता पक्षाचा कमंडलवाद फोफावायच्या आधी हिंदू म्हणून अस्मिता जागी करणारे बाळासाहेबच.'

'बाळासाहेबांनी हिंदूंकडे व्होटबँक म्हणून नाही पाहिलं. त्यांच्यासाठी हा विषय अस्मितेचा होता, धर्माप्रतीच्या प्रेमाचा होता. आणि हे करताना बाळासाहेबांनी, प्रबोधनकारांकडून आलेला तर्कवाद पण सोडला नाही. बाळासाहेब हे कमालीचे हिंदुप्रेमी होते, पण म्हणून त्यांच्यातली चिकित्सक वृत्ती लोप पावली नाही. त्यामुळे बाळासाहेबांची प्रतिमा चोरून हिंदुत्वाचे वारस म्हणून मिरवणाऱ्यांची किंवा त्यावर मतं मागणाऱ्यांची गंमत वाटते.', असा टोलाही राज यांनी भाजपचे नाव न घेता लगावला.

'ना त्यांना बाळासाहेब माहित आहेत, ना त्यांना प्रबोधनकार माहित आहेत, ( अर्थात ऐकणं आणि वाचणं यांचा दुष्काळ असल्यामुळे ) त्यामुळे त्यांना बाळासाहेबांच्या विचारांची झालेली मशागत किती समृद्ध होती ह्या पुसटशी देखील कल्पना नाही.', असे देखील त्यांनी म्हटले.

पुढे राज ठाकरे म्हणाले की, फक्त मतं, सत्ता मिळवणे आणि ती सत्ता मिळाल्यावर वाट्टेल तसं ओरबाडणं म्हणजे राजकारण हे रूढ होत असताना, समाजकारण आधी आणि मग राजकारण हे आमच्या विचारात रुजवणाऱ्या बाळासाहेबांच्या स्मृतीस महाराष्ट्र नवनिर्माण सेनेतर्फे विनम्र अभिवादन