बावनकुळे, मुनगंटीवार म्हणतात, राज्यपाल कोणत्या संदर्भाने बोलले माहिती नाही..

मुंबई : महाराष्ट्राचे राज्यपाल भगतसिंग कोश्यारी यांनी छत्रपती शिवाजी महाराजांबद्दल केलेल्या वादग्रस्त विधानानंतर राज्यभर यावर संतप्त प्रतिक्रिया उमटत आहेत. मात्र याबाबत आता भाजपनेत्यांकडून सावध भूमिका घेतली जात आहे. भाजपकडून आता बचावात्मक पवित्रा घेतला जात आहे. भाजपचे प्रदेशाध्यक्ष चंद्रशेखर बावनकुळे म्हणाले, राज्यपालांनी हे विधान कोणत्या संदर्भाने केले हे आपल्याला माहित नाही, तर मंत्री सुधीर मुनगंटीवार यांनीही राज्यपालांना तसे म्हणायचे नसेल, असे म्हणत सारवासारव केली.

एका वृत्तवाहिनीला प्रतिक्रीया देताना मुनगंटीवार म्हणाले, छत्रपती शिवाजी महाराजांबद्दल वक्तव्य करताना राज्यपालांनी यांनी कालबाह्य शब्दाचा वापर केला नाही. 'जाणता राजा' म्हणून राष्ट्रवादी काँग्रेसचे अध्यक्ष शरद पवार यांनाही लोक संबोधतात. याचा अर्थ पवारांची छत्रपती शिवाजी महाराज सोबत तुलना होत आहे, असे नाही.

दिवंगत बाळासाहेब ठाकरे यांनादेखील काही जण प्रतिशिवाजी म्हणून संबोधतात. याचा अर्थ बाळासाहेब हे शिवाजी महाराज होतात का? उदाहरणे सांगताना ते प्रतिकात्मक म्हणून वापरला जातो. दोन बंधूमध्ये प्रेम असेल तर आपण त्यांना राम आणि लक्ष्मण उपमा देतोच. यामध्ये कोणाचाही अवामान किंवा अनादर करण्याचा हेतू असत नाही, असे मुनगंटीवार म्हणाले.

यावर बोलताना बावनकुळे म्हणाले, राज्यपालांच्या या विधानाचा संदर्भ मला माहित नाही. मात्र, शिवाजी महाराज हे आपल्या सर्वांचे आदर्श आहेत. महाराजांची तुलना कोणाशीच होऊच शकणार नाही. मात्र सावरकर यांच्याविषयी बोलताना राहुल गांधी यांनी जे वक्तव्य केलं आहे, उद्धव ठाकरेंमध्ये हिंमत असेल तर त्यांनी आधी महाविकास आघाडीतून बाहेरपडून सावरकरांवरील प्रेम दाखवावं. ठाकरे हे काँग्रेसधारर्जीणे आहेत, असे बावनकुळे म्हणाले.