Eknath Shinde सरकारचा पहिल्याच बैठकीत मोठा निर्णय; पूर नुकसानीची मदत दुप्पट

मुंबई : शिंदे सरकाराचा बहुचर्चीत मंत्रीमंडळ विस्तार मंगळवारी पार पडला. त्यामध्ये १८ मंत्र्यांनी शपत घेतली. त्यानंतर आज राज्य मंत्रिमंडळाची बैठक पार पडली. यामध्ये काही महत्त्वाचे निर्णय झाल्याचे मुख्यमंत्री एकनाथ शिंदे (Eknath Shinde) यांनी सांगितले. मंत्रीमंडळ विस्तार झाल्यानंतर शिंदे सरकारची आज पहिलीच बैठक झाली. सर्व मंत्री या बैठकीला हजर होते. 15 लाख हेक्टरपर्यंत नुकसान या अतिवृष्टीत झाल्याची माहिती देण्यात आली.

बैठकीनंतर पत्रकारांशी बोलताना शिंदे म्हणाले, राज्यात अतिवृष्टीमुळे नुकसान झालेल्या शेतकऱ्यांना दुप्पट नुकसान भरपाई, देण्यात येणार आहे. जून आणि जुलैमध्ये अतिवृष्टीचा फटका बसलेल्या नुकसानग्रस्तांना राज्य सरकारने मोठा दिलासा आहे. शेतकऱ्यांना एनडीआरएफच्या मदतीपेक्षा दुप्पट मदत करणार आहे. तसेच मदतीसाठी दोन हेक्टरची मर्यादा होती. ती आता तीन हेक्टर पर्यंत करण्यात आली आहे.

याच बरोबर कुलाबा-वांद्रे-सीप्झ या मुंबई मेट्रो मार्ग-3 प्रकल्पाच्या सुधारित खर्चास मान्यता देण्यात आली आहे. मेट्रोला वाढिव निधी देण्यात आला आहे. मागील अडीच वर्षाच्या काळात काम बंद असल्यासारखेच होते, असा निशाणा उपमुख्यमंत्री देवेंद्र फडणवीस (Devendra Fadnavis) यांनी महाविकास आघाडी सरकारवर साधला.

मेट्रोचा प्रकल्प २०२२ मध्ये पूर्ण करायचा होता. मात्र, अडिच वर्षांत काम न झाल्यामुळे त्याचा खर्च १० हजार कोटी रुपयांनी वाढला आहे. हा प्रकल्प पूर्ण झाल्यानंतर साधारण, १३ लाख लोक मेट्रोने प्रवास करणार आहेत. त्यामुळे मुंबई करांसाठी मोठा दिलासा या प्रकल्पामुळे मिळणार असल्याचे फडणवीस यांनी सांगितले. तसेच रत्नागिरी येथे शासकीय वैद्यकीय महाविद्यालय उभारण्यास मान्यता देण्यात आली आहे.