NCP Political Crisis : शरद पवारांना मोठा धक्का ! वायबी सेंटरच्या बैठकीला उपस्थिती लावलेल्या आमदाराचं २४ तासांतच अजितदादांना समर्थन

Mumbai : राष्ट्रवादी काँग्रेस पक्षातील उभ्या फुटीनंतर राजकीय घडामोडींना वेग आला आहे. अजित पवार यांनी बंडानंतर राष्ट्रवादी काँग्रेस पक्ष आणि चिन्हावर दावा करतानाच बहुतांश आमदार आपल्या सोबत असल्याचं म्हटलं आहे. याचवेळी पवार गटाकडून देखील अजित पवारांसोबत गेलेल्या आमदारांपैकी काहीजण आमच्या संपर्कात असल्याचा दावा केला जात आहे. बुधवारी(दि.५) मुंबईत झालेल्या दोन्ही गटाच्या बैठकीत कुणाकडे किती आमदार आहेत हे स्पष्ट झालं आहे. याचदरम्यान, शरद पवारांच्या बैठकीला उपस्थित असलेल्या आमदाराने आता अजित पवारांना पाठिंबा दिला आहे.

शरद पवारां(Sharad Pawar)नी आयोजित बुधवारी आयोजित केलेल्या वायबी सेंटर येथील बैठकीला मोर्शी मतदारसंघाचे अपक्ष आमदार देवेंद्र भुयार उपस्थित होते. तसे ते नेहमीच अजित पवारांचे कट्टर समर्थक म्हणून त्यांची ओळख आहे. पण त्यांनी पवार गटाच्या बैठकीला हजेरी लावल्यानं राजकीय वर्तुळात अनेकांच्या भुवया उंचावल्या होत्या. मात्र, या बैठकीनंतर २४ तासांतच भुयार यांनी आपल्या भूमिकेपासून यू टर्न घेत अजित पवार गटाला पाठिंबा दिला आहे.

अजित पवार उपमुख्यमंत्रिपदाची शपथ घेऊन सत्तेत गेल्यानं त्यांच्याकडे जाणाऱ्या आमदारांची संख्या अधिक आहे. पवारांचा बालेकिल्ला मानल्या जाणाऱ्या पुण्यातील १० पैकी बहुतांश आमदार अजित पवारांकडे गेले आहेत. तर काही वेट अँड वॉचच्या स्थितीत आहेत. त्यातच आता शरद पवारांचा मेळाव्याला उपस्थिती लावलेले आमदार देवेंद्र भुयार हे उपमुख्यमंत्री अजित पवार यांच्या मुंबईतील निवासस्थानी जाऊन त्यांना समर्थन दिलं आहे.

पवार गटाच्या वायबी सेंटर येथील मेळाव्याला काही तास उलटत नाही तोच देवेंद्र भुयार यांनी अजित पवार गटाला सामील झाले आहेत. त्यामुळे शरद पवार गटाला हा मोठा धक्का समजला जात आहे. दरम्यान, शरद पवार गटातील आणखी काही आमदारांनी आमच्याशी संपर्क साधला आहे असा दावा पवार गटाकडून केला जात आहे. त्यामुळे शरद पवार गटातील आणखी काही आमदार अजित पवार (Ajit Pawar)गटात सामील होणार का? याबाबत राजकीय चर्चांना उधाण आलं आहे.

(Edited By Deepak Kulkarni)