Shivsena Politics : भाजपला धक्का, 8 नगरसेवकांनी केला शिवसेनेत प्रवेश!

BJP Vs Shivsena : ठाणे जिल्ह्यातील मुरबाड नगरपंचायतीमध्ये मोठे फेरबदल झाले आहेत. भाजप परिवर्तन पॅनलमधील आठ नगरसेवकांनी भाजपची साथ सोडून एकनाथ शिंदेंच्या शिवसेनेत प्रवेश केला. भाजपकडून फक्त विशिष्ट सदस्यांनाच निधी देण्यात येत होता, जाणुनबुजून आमची विकास कामे थांबवती जात होती, असा आरोप करत या नगरसेवकांनी केला होता.

माजी नगराध्यक्ष रामभाऊ भगवान दुधाळे, उपनगराध्यक्षा दीक्षिता विकास वारघडे, गटनेते मोहन भालचंद्र गडगे, बांधकाम सभापती उर्मिला सुजित ठाकरे, पाणीपुरवठा सभापती स्नेहा सागर आंबवणे, नगरसेविका नम्रता नंदकुमार जाधव, रविना विनायक राव, अनिता संतोष मारके यांच्या अनेक कार्यकर्त्यांनी शिवसेनेत प्रवेश केला.

शिवसेनेत झालेल्या या प्रवेशामुळे ठाणे जिल्ह्यात पुन्हा एकदा एकनाथ शिंदेंची पकड मजबूत झाल्याचे मानले जात आहे. इतर पक्षांमधून भाजपमध्ये इन्कमिंग होत असताना भाजपमधील नगरसेवकांनी शिंदेंना साथ दिल्याने आगामी स्थानिक स्वराज संस्था निवडणुकीत शिवसेनेच्या नेत्यांचा काॅन्फिडन्स वाढला असल्याचे सांगितले जात आहे.

माजी नगराध्यक्ष रामभाऊ दुधाळे म्हणाले, उपमुख्यमंत्री एकनाथ शिंदें यांच्या माध्यमातून होणारी विकास कामे आम्ही पाहिली आहेत. ठराविक सदस्यांनी निधीचे वितरण आणि जातीपातीचे राजकारणामुळे आम्ही वंचित होतो. त्यामुळे भाजपपासून वेगळे होत आम्ही परिवर्तन पॅनल स्थापन केले होते. शिंदेंच्या माध्यमातून होत असलेल्या विकास पाहून आम्ही त्यांना साथ देण्याचा निर्णय घेतला.

'परिवर्तन' शिवसेनेत विलिन

शिवसेना नेते प्रकाश पाटील यांच्या उपस्थितीमध्ये परिवर्तन पॅनलमधील सदस्यांनी शिवसेनेत प्रवेश केला. परिवर्तनमधील सर्वच नगरसेवक शिवसेनेत आल्याने परिवर्तन पॅनल शिवसेनेत विलिन करण्यात आला आहे. प्रकाश पाटील यांनी सांगितले की, सर्वांना निधी मिळत असताना मुरबाड शहर वंचित होते. आम्ही पक्षात सर्वांचे स्वागत केले असून प्रवेश करणाऱ्यांच्या मागे पक्ष ठामपणे उभा राहणार आहे.