दरेकरांचा पाय खोलात; मजूर म्हणून 25 हजार रुपयांचा मोबदला घेणं पडणार महागात

मुंबई : भाजप (BJP) नेते आणि राज्याचे विधान परिषदचे विरोधी पक्षनेते प्रवीण दरेकर (Pravin Darekar) हे अडचणीत आले आहेत. दरेकरांच्या अटकपूर्व जामीन अर्जावर न्यायालयात सुनावणी सुरू आहे. त्यांनी कामगार सहकारी संस्थेकडून घेतलेल्या 25 हजार रुपयांच्या मोबदल्याचा मुद्दा न्यायालयीन सुनावणीत उपस्थित झाला आहे. यामुळे दरेकरांना हे पैसै महागात पडण्याची शक्यता निर्माण झाली आहे. (Pravin Darekar News)

मुंबई उच्च न्यायालयाकडून (Mumbai High Court) दिलासा न मिळाल्याने दरेकरांना अटक होण्याची शक्यता आहे. मजूर प्रकरणी दाखल गुन्ह्यात अटक न करण्याची दरेकर यांची मागणी उच्च न्यायालयाने फेटाळली होती. त्यानंतर दरेकरांनी सत्र न्यायालयात अर्ज दाखल केला आहे. या याचिकेवर आज सुनावणी सुरू आहे. मुंबई जिल्हा मध्यवर्ती सहकारी बँकेच्या निवडणुकीत मजूर वर्गातून निवडणूक लढवणारे भाजप नेते प्रवीण दरेकर अडचणीत आले आहेत. या प्रकरणात मुंबई पोलिसांकडून दरेकर यांच्यावर गुन्हा दाखल करण्यात आला आहे.

प्रवीण दरेकर यांनी कामगार असल्याचे सांगून कामगार सहकारी संस्थेकडून 25 हजार रुपये मोबदला घेतला, असे मुंबई पोलिसांनी आज न्यायालयासमोर सांगितले. दरेकर यांनी गेल्या आठवड्यात अटकपूर्व जामिनासाठी अर्ज केला आहे. पोलिसांनी विशेष सरकारी वकिलांमार्फत आज त्यांच्या जामीन अर्जावर म्हणणे मांडले. कामगार सहकारी संस्थेचा सभासद होण्यासाठी मजूर असल्याचा खोटा दावा दरेकरांनी केला. दरेकर यांच्याकडे उपजीविकेचे अन्य साधन असतानाही त्यांनी मजूर असल्याचा खोटा दावा केला. या आधारे ते मुंबई जिल्हा सहकारी बँकेचे संचालक होण्यासाठी रिंगणात उतरले आणि त्यांना चार लाखांहून अधिक मानधन मिळवले, असे वकिलांनी म्हटले आहे.

कामगार असल्याचा दावा करून दरेकर हे 1999 मध्ये कामगार सहकारी संस्थेचे सदस्य झाले. त्यांनी 2016 मध्ये विधान परिषद निवडणुकीपूर्वी दाखल केलेल्या प्रतिज्ञापत्रात त्यांच्याकडे 2.3 कोटी रुपयांची मालमत्ता होती. त्यांच्याकडे 2.5 लाख रुपयांच्या मासिक उत्पन्नासह 91 लाख रुपयांची रोकड होती. यावरून ते मजूर नसल्याचे दिसून येते, असेही सरकारी वकिलांनी न्यायालयाच्या निदर्शनास आणून दिले.