Congress BJP Controversy: भाजप पदाधिकाऱ्यांनी काँग्रेस नेत्याला नेसवली साडी, हायकमांडकडून गंभीर दखल; राहुल गांधींचा खणाणला फोन, म्हणाले...'

Mumbai News: डोंबिवलीमधील काँग्रेसचे नेते प्रकाश पगारे यांनी पंतप्रधान नरेंद्र मोदींचा आक्षेपार्ह फोटो पोस्ट केल्यानंतर राजकारण तापलं होतं. संतप्त भाजपा पदाधिकाऱ्यांनी काँग्रेसच्या या ज्येष्ठ नेत्याला घेरत जबरदस्तीनं साडी नेसवली होती. आता याचप्रकरणी मोठी माहिती समोर आली आहे.

भाजप पदाधिकाऱ्यांनी साडी नेसवल्याचा व्हिडिओ सोशल मीडियावर मोठ्या प्रमाणात व्हायरल झाला. या व्हिडीओची दखल थेट दिल्लीतून घेण्यात आली आहे. साडी नेसवलेल्या काँग्रेसचे नेते प्रकाश पगारे यांच्याशी थेट काँग्रेस नेते आणि संसदेतील विरोधी पक्षनेते राहुल गांधी (Rahul Gandhi) यांनी फोन करुन संवाद साधला आहे.

राहुल गांधी यांनी यावेळी प्रकाश (मामा) पगारे यांना तुम्ही घाबरु नका,काँग्रेस तुमच्यासोबत असल्याची ग्वाही दिली आहे. तसेच आम्हाला तुमच्याबद्दल बाळासाहेब थोरातांनी माहिती दिली असल्याचा उल्लेखही त्यांनी यावेळी केला.

राहुल गांधी म्हणाले, मामा ,तुम्ही 50 वर्षांपासून काँग्रेसचे (Congress) कार्यकर्ते आहात. तुमचा खूप आदर आहे. यानंतर राहुल गांधी मुंबईत आले, तर लवकर माझी भेट घेतील,असंही मामा पगारे यांनी स्पष्ट केलं.

कल्याण डोंबिवलीमध्ये भाजपा आणि काँग्रेस यांच्यात राजकीय वाद सुरु झाला आहे. प्रकाश पगारे यांनी सोशल मीडियावर एक व्हिडिओ शेअर केला आहे. या व्हिडिओमध्ये पंतप्रधान नरेंद्र मोदी यांना साडी घेतल्याचे फोटो होतो. तसेच मीच माझ्या रुपाचे गाणं लावण्यात आले होते. मी पण ट्रेंड फॉलो करतो, असे कॅप्शन या व्हिडिओवर देण्यात आले होते. या व्हिडिओ पाहून भाजप कार्यकर्ते संतप्त झाले होते.

प्रकाश पगारे यांच्या सोशल मीडियावरील पोस्टनंतर मंगळवारी भाजपाचे जिल्हाध्यक्ष नंदू परब, माजी नगरसेवक संदीप माळी यांसह भाजपाच्या शिष्टमंडळाने मानपाडा पोलिस ठाण्याचे वरिष्ठ पोलीस निरीक्षक संदीपान शिंदे यांची भेट घेत त्यांना निवेदन दिले. त्यानंतर प्रकाश पगारे यांना एका ठिकाणी बोलवून त्यांना जबरदस्तीने साडी नेसवली आणि त्यांचा उपरोधिकपणे सत्कार केला.

भाजपच्या निवेदनात पगारे यांनी पंतप्रधान मोदी यांची विडंबनात्मक बदनामी केल्याचा आरोप केला आहे. अशा प्रकारच्या कृतीमुळे देशातील सर्वोच्च नेतृत्वाचा अपमान होत असून यामुळे जनतेच्या भावना दुखावल्या असल्याचं म्हटलं आहे. भाजपनं याप्रकरणाची गंभीर दखल घेत संबंधित व्यक्ती विरोधात तातडीने गुन्हा दाखल करावा असंही निवेदनात नमूद केलं आहे.

प्रकाश पगार काय म्हणाले..?

काँग्रेस नेते प्रकाश पगारे म्हणाले, आपल्याला एक पोस्ट आली, ती मी केवळ आपण व्हायरल केली. त्यांनी मला खोटं सांगून बोलावून घेऊन मला जबरदस्ती साडी नेसवली. मला साडी नेसवा अथवा काही ही करा मी काँग्रेसचे काम शेवटच्या श्वासपर्यंत करत राहणार. भाजपच्या गुंडाविरोधात लढत राहणार असल्याचा दावाही त्यांनी केला.