BMC Elections 2025: ठाकरे बंधुंच्या युतीत मोठा ट्विस्ट, मनसेची स्वबळावर लढण्याची तयारी? 125 जागांवर ठाम

MNS Election Strategy 2025: मुंबई महापालिकेत उद्धव ठाकरे-राज ठाकरे यांची युती होईल, अशी शक्यता वर्तवण्यात येत आहे. उद्धव ठाकरेंनी तर जाहीर सभांमधून आम्ही एकत्र आलोय एकत्र राहण्यासाठी, असे सांगितले आहे.

मात्र, मनसे स्वबळावर लढण्याची हालचाली करते आहे का? अशी चर्चा सुरू झाली आहे. कारण मुंबई महापालिकेतील 227 जागांपैकी 125 जागांवर मनसेची ताकद असल्याचा दावा करण्यात येत आहे. या जागा लढण्यावर मनसे नेते ठाम आहेत.

मनसेच्या (MNS) नेत्यांकडून मागील काही दिवसांपासून प्रभागनिहाय आढाव घेण्यात येत होता. या आढाव्यामध्ये तब्बल 125 जागांवर मनसेची ताकद असल्याचे समोर आले होते. त्यामुळे या जागा आपण लढल्याच पाहिजेत, असे पदाधिकारी सांगत होते. शिवसेना उद्धव बाळासाहेब ठाकरे पक्षाोबत युती केल्यास येवढ्या जागा वाट्याला येतील की नाही याविषयी शंका व्यक्त केली जात आहे.

मनसेचे नेत्यांकडून अजून कोणासोबत युती झाली नाही मात्र चर्चा सुरू आहेत, असे सांगितले जात आहे. पक्षाच्या संघटनात्मक पातळीवर बैठका घेऊन पक्ष कोणत्या प्रभागात मजबूत आहे त्याचा आढावा घेण्यात आला आहे. दरम्यान, युती करून लढायचे की स्वबळावर याचा निर्णय राज ठाकरे घेणार आहेत.

कोणत्या मतदारसंघात ताकद

मुंबईतील तब्बल आठ मतदारसंघात मनसेची ताकद आहे. मराठी भाषा बहुल या मतदारसंघामध्ये भांडूप, घाटकोपर, जोगोश्वरी, विक्रोळी, दादर, परळ, लालबाग या मतदारसंघांचा समावेश होतो.

मनसेकडून 125 जागांवर ताकद असलेल्या प्रभागांची यादी तयार करण्यात आली आहे. त्यामुळे उद्धव ठाकरेंसोबत युतीवर चर्चा होताना या मतदारसंघासाठी त्यांचा आग्रह असणार आहे. तर, मराठी भाषिक मतदारसंघात वर्चस्व टिकवण्यासाठी उद्धव ठाकरेंच्या शिवसेनेकडून देखील या जागांवर दावा केला जाण्याची शक्यता आहे.

2017 मुंबई महापालिका पक्षीय बलाबल

एकुण जागा - 227

शिवसेना - 93 (मनसेतून आलेल्या 6 आणि अपक्ष तीन नगरसेवकांसह)

भाजप - 85

काँग्रेस - 30

राष्ट्रवादी काँग्रेसचे - 9

समाजवादी - 6

एमआयएम - 2

मनसे- 1