फडणवीसांच्या बंगल्याबाहेर कॉग्रेसचे आंदोलन ; भाजप कार्यकर्ते ताब्यात

मुंबई : पंतप्रधान नरेंद्र मोदी यांनी केलेल्या महाराष्ट्राबाबत केलेल्या विधानाच्या निषेधार्थ आज विरोधी पक्षनेते देवेंद्र फडणवीस (Devendra Fadnavis) यांच्या बंगल्यासमोर आंदोलन करण्याची इशारा कॅाग्रेसचे प्रदेशाध्यक्ष नाना पटोले (Nana Patole)यांनी दिला आहे. त्यावरुन भाजप नेते प्रसाद लाड (Prasad Lad) यांनी पटोलेंचा एकेरी भाषेत उल्लेख करत बंगल्यासमोर येवूनच दाखव, तुमच्या आंदोलनाला जशास तसे उत्तर देऊ असा इशारा दिला आहे.

या पार्श्वभूमीवर कॉग्रेस आणि भाजपमध्ये वाद चिघळण्याचा शक्यता आहे. फडणवीस यांच्या 'सागर' बंगल्याबाहेर कॉग्रेस आणि भाजपचे कार्यकर्ते जमले आहे. परिसरात पोलिस बंदोबस्त वाढविण्यात आला आहे.कॉग्रेसचे नेते अतुल लोंढेसह भाजपच्या अनेक कार्यकर्त्यांना ताब्यात घेण्यात आले आहे.

''पंतप्रधान नरेंद्र मोदी यांनी महाराष्ट्राची माफी मागावी,'' अशी मागणी करत काँग्रेसनं आंदोलन करण्याची तयारी केली आहे. मलबार हिल येथील विरोधीपक्ष नेते देवेंद्र फडणवीस यांच्या सागर बंगल्याबाहेर पोलिसांचा कडेकोट बंदोबस्त तैनात करण्यात आला. काँग्रेसचे आंदोलक फडणवीस यांच्या घराच्या परिसरात पोहोचू नयेत याची काळजी पोलिसांनी घेत नेपेन्सी रोड येथे काँग्रेस आंदोलकांना अडवत याच ठिकाणी आंदोलन करण्याची परवानगी दिली.

काँग्रेसला आंदोलनाची परवानगी देता मग आम्हाला का नाही? असा सवाल भाजप आमदार प्रसाद लाड यांनी पोलिसांना केल्यानंतर पोलिसांनी भाजपला ही शांततेत आंदोलन करा, अशी परवानगी दिल्याची माहिती आहे. काँग्रेस आणि भाजप कार्यकर्ते हे आंदोलन करतांना समोरासमोर येऊ नयेत, याची काळजी पोलिसांनी घेत ही परवानगी दिली. काँग्रेसचे आंदोलन नेपेन्सी रोडला रोखण्याची तयारी पोलिसांनी केली तर त्याच्याविरुद्ध दिशेला असलेल्या रस्त्याच्या एक किमी अंतरावर भाजप कार्यकर्त्यांना जमण्याची परवानगी देण्यात आली. ''शांततेत आंदोलन करा," असे आवाहन पोलिसांनी केले आहे. नाना पटोले यांच्या सुरक्षतेत वाढ करण्यात आली आहे.