Eknath Shinde News: मुख्यमंत्रीपद हवंय का? अन् शिंदेंच्या डोळ्यात पाणी आलं; केसरकरांनी सांगितला 'तो' किस्सा

Maharashtra Politics : ''उद्धव ठाकरे यांनी एकनाथ शिंदे यांना तुम्हाला मुख्यमंत्रीपद हवं आहे का? अशी विचारणा केली होती. मात्र, तेव्हा एकनाथ शिंदेंच्या डोळ्यात पाणी आले होते. कारण एकनाथ शिंदे यांचा अपमान झाला होता. आपण शिवसेनेसाठी केलेल्या त्यागाची किंमत अशा पद्धतीने परत केली जाते, याचं एकनाथ शिंदेंना खूप वाईट वाटलं'', असं शिंदे गटाचे प्रवक्ते दीपक केसरकर यांनी सांगितलं आहे. ते आज माध्यमांशी बोलत होते.

दीपक केसरकर (Deepak Kesarkar) म्हणाले, ''राज्यसभेची निवडणूक झाली. त्यामध्ये पराभव झाला. या पराभवाचा जाब राष्ट्रवादीला विचारला गेला नाही. पण उलट एकनाथ शिंदे (Eknath Shinde) यांच्यावरील जबाबदारी काढून घेण्यात आली आणि एका तरुण आमदारांकडे जबाबदारी देण्यात आली. ते आमच्यावर नजर ठेवत आहेत असंच वाटायचं. ज्यांना राजकारण माहित नव्हतं ते तरूण दादागिरी करत होते '', असं ते म्हणाले.

''स्वाभिमान कायम ठेवण्यासाठी काँग्रेस (Congress) -राष्ट्रवादीबरोबर जायला नको होतं. आपण आपल्या मुळ युतीकडे जाऊया, असं शिंदे यांचं म्हणणं होतं'', असं दीपक केसरकर यांनी सांगितलं. तसेच ''मुख्यमंत्रीपदासाठी कुणी काय काय केलं? याबाबत सविस्तर पुढील 2-4 दिवसांत पक्षाचा प्रवक्ता म्हणून सांगणार आहे'', असंही केसरकर म्हणाले.

''जे लोक झोपतात ते स्वप्न बघतात. पण जे लोक काम करतात ते दिवसरात्र धावत राहतात. मुख्यमंत्री देखील झोपत नाहीत तर रात्री दोन-अडीच वाजेपर्यंत काम करत राहतात. आम्ही सकाळी 11 वाजल्यानंतर कार्यक्रम करणारे लोक नाहीत. आम्ही जनतेची सेवा करणारे लोक आहोत. आम्हीच बाळासाहेबांचे खरे शिवसैनिक आहोत'', असंही ते यावेळी म्हणाले.

''बाळासाहेब ठाकरे (Balasaheb Thackeray) यांच्या स्वप्नांना काँग्रेस विरोध करत होती. पण त्यांनाच काश्मिरमध्ये जाऊन भेटण्याचे काम सध्या सुरू आहे. त्यामुळे बाळासाहेब ठाकरे यांचा एवढा मोठा अपमान कुणीही केला नाही. तो फक्त संजय राऊतांनी (Sanjay Raut) केला आहे. सत्तेसाठी जे लोक काँग्रेसचे पाय धरतात. राष्ट्रवादीच्या मागे मागे धावतात. त्यांना बाळासाहेबांचे नाव घेण्याचा अधिकार नाही'', असा हल्लाबोल केसरकर यांनी संजय राऊत यांच्यावर केला.