Khichadi Ghotala : सूरज चव्हाणांना 'ईडी'चे समन्स; आज पुन्हा होणार चौकशी

Mumbai News: खिचडी वाटपात झालेल्या कथित गैरव्यवहार प्रकरणाची आर्थिक गुन्हे शाखेकडून प्राथमिक चौकशी सुरु आहे. या प्रकरणी ठाकरे गटाचे आमदार आदित्य ठाकरे यांचे निकटवर्तीय सूरज चव्हाण यांना पुन्हा आर्थिक गुन्हे शाखेने समन्स बजावत चौकशीसाठी हजर राहण्याचे आदेश दिले आहेत. सूरज चव्हाण हे युवासेनेचे सचिव आहेत. आदित्य ठाकरे यांचे ते निकटवर्तीय आहेत.

गुन्हे शाखेकडून काही दिवसांपासून खिचडी वाटपातील कथित गैरव्यवहाराची प्राथमिक चौकशी सुरु आहे. चव्हाण यांना आजच चौकशीसाठी हजर राहण्याचे आदेश दिले आहेत. काही दिवसांपूर्वीच ईडीने कोविड सेंटर गैरव्यवहार प्रकरणी सूरज चव्हाण यांच्या घरी छापेमारी केली होती. आता या प्रकरणातही त्यांना चौकशीसाठी बोलवण्यात आल्याने त्यांच्या अडचणी चांगल्याच वाढल्याचे दिसत आहे.

यापूर्वी माजी मुख्यमंत्री उद्धव ठाकरे व माजी मंत्री आदित्य ठाकरे यांचे निकटवर्तीय समजले जाणारे खासदार संजय राऊत, माजी मंत्री अनिल परब, माजी मंत्री रविंद्र वायकर यांना या त्या कारणाने अडचणीत आणून चौकशी झाली आहे. त्यामुळे ठाकरे गटाच्या नेत्यांना चौकशीच्या फेऱ्यात अडकविण्याचा तरी प्रयत्न या केंद्र सरकारच्या यंत्रणेकडून केला जात नाही का अशी कुजबुज ऐकवयास मिळत आहे.

कोरोना काळात ठाकरे गटाच्या नेत्यांनी स्थलांतरित मजुरांना खिचडी पॅकेट पुरवण्याचे कोट्यवधींचे कंत्राट मिळवले. लॉकडाऊन काळात मुंबईतील स्थलांतरित मजुरांना २५ लाख खिचडी पॅकेट पुरवण्यात आले होते. यात १६० कोटींचा खिचडी घोटाळा झाल्याचा आरोप भाजप नेते किरीट सोमय्या यांनी केला होता. खिचडी पॅकेट पुरवण्याच्या नावाखाली ठाकरे गटाने पालिकेकडून ८.१० कोटी रुपये मिळाले. त्यातील ४ कोटी बोगस कंपन्यांना वळवण्यात आल्याचा दावाही सोमय्यांनी केला होता. ठाकरे गटाच्या नेत्यांनी बोगस कंपन्या आणि नेत्यांच्या नावावर हा कोट्यवधींचा घोटाळा केल्याचा आरोप त्यांनी केला .

Edited By- Anuradha Dhawade