Lok Sabha Election 2024 : शिंदे गटाचे 13 खासदार पुन्हा लोकसभेच्या मैदानात; तिकीट कापणार असल्याच्या अफवा?

Mumbai Latest News : मुख्यमंत्री एकनाथ शिंदे यांच्या शिवसेनेचे विद्यमान १३ खासदार पुन्हा एकदा लोकसभेच्या मैदानात उतरतील, अशी माहिती आता समोर येत आहे. लोकसभा निवडणुकींच्या तयारीला लागण्याचे आदेश मुख्यमंत्री शिंदे यांनी आपल्या नेत्यांना, पदाधिकाऱ्यांना आणि कार्यकर्त्यांना दिले आहे. रामटेकचे खासदार कृपाल तुमाणे यांनी ही माहिती माध्यमांना दिली आहे. (Latest Marathi News)

लोकसभा निवडणुका आता नजीक येऊन ठेपलेल्या आहेत. यासाठी सर्वच पक्ष जोरदार तयारी करत आहेत. शिंदे यांची शिवसेनाही महायुतीतला घटकपक्ष म्हणून तयारीला लागले आहेत. यावर आता शिंदे गटाचे खासदार कृपाल तुमाणे म्हणाले, "आमचे विद्यमान तेरा खासदार हे लोकसभेची निवडणूक लढणार आहेत. त्यांनी याची जोमात तयारी सुरू केली आहे. आपापल्या मतदारसंघात निवडणुकीच्या दृष्टीने खासदार काम करत आहेत. मतदारसंघाच्या विकासासाठी आम्ही सतत प्रयत्न करत आहोत. तेरा खासदारांना मुख्यमंत्री शिंदेंनी निर्देश दिलेले आहेत."

तेरा खासदापैकी काही चेहरे बदलण्यात येणार आहे, पक्षाच्या चिन्हाबाबत काही ॲडजेस्टमेंट होणार आहे, अशी चर्चा होती, या प्रश्नावर तुमाणे म्हणाले, "हा मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांचा विषय आहे. मात्र आम्ही तेरा विद्यमान खासदार पुन्हा लढणार यात काही शंका नाही," अशीही मोठी माहिती तुमाणे यांनी दिली.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

"तिकीट देताना कसलाही फॉर्म्युला ठरलेला नाही. नागपूरचे हिवाळी अधिवेशन संपल्यानंतर दोन्ही पक्षांचे नेते बसतील आणि याबाबतचा योग्य तो निर्णय घेतील. त्याच्यामध्ये जो फॉर्म्युला ठरेल, तो अंतिम असणार आहे. आम्ही निवडणुकीला सामोरे जाणार आणि महायुतीचे ४५ खासदार निवडून येणार, यात कसलीही शंका नाही, असा विश्वासही तुमाणेंनी व्यक्त केला.

(Edited By - Chetan Zadpe)