Ganesh Naik Controversy : गणेश नाईक स्वत:च्याच वक्तव्यामुळे अडचणीत; शिंदेसेनेने अचूक टाईमिंग साधलं, मंत्रिपद घालवण्यासाठी न्यायालयात जाणार

Navi Mumbai, 17 Oct : भाजपचे नवी मुंबईतील नेते तथा राज्याचे वनमंत्री गणेश नाईक हे त्यांनीच केलेल्या एका वक्तव्यामुळे वादाच्या भोवऱ्यात अडकलेत. तर याच संधीचा फायदा घेत उपमुख्यमंत्री एकनाथ शिंदेंची शिवसेना नाईक यांचं मंत्रिपद घालवण्याच्या तयारीत आहे.

मंत्री गणेश नाईक आणि शिंदेंच्या शिवसेनेमधील वाद सर्वश्रुत आहे. नाईक आणि शिंदे दोन्ही नेते महायुतीत मंत्री असले तरी त्यांच्यातील धुसफूस सतत बाहेर येत असते. मंत्री नाईक यांनी ठाण्यात जनता दरबार घेत शिंदेंची पॉवर कमी करण्यासाठी प्लॅन केल्याचा आरोप केला जातो.

अशातच आता मंत्री गणेश नाईक वादात अडकल्याचा फायदा शिंदेंच्या शिवसेनेकडून घेतला जाणार असल्याचं समोर आलं आहे. कारण नवी मुंबई वाशी येथील एका संस्थेच्या मेळाव्यात बोलताना वनमंत्री गणेश नाईक यांनी, 'माझ्याकडे हरीण आणि बिबट्याची पिले होती. पण मी वनमंत्री झाल्यावर त्या पिलांना मी सोडून दिलं, असे वक्तव्य केलं आहे. या वक्तव्यामुळेच ते अडचणीत सापडले आहेत.

ते म्हणाले, 'काही वर्षांपूर्वी माझ्यासाठी एकजण हरिण घेऊन आले होते. त्यावेळी मी त्या हरीणला सांभाळले होते. परंतू, ज्यावेळी मी वनमंत्री झालो तेव्हा मी त्याला सोडून दिलं. कारण वनमंत्री झाल्यानंतर जंगलातले प्राणी पाळणे शक्य नाही. शिवाय मी बिबट्याची पिल्ले सुद्धा पाळली होती. परंतू, या प्राण्यांना कोण सांभाळणार? आपण प्रेमाने सांभाळू परंतू, कायद्यानुसार जंगलातले प्राणी पाळणे हा गुन्हा आहे.'

नाईकांविरोधात शिंदेसेना न्यायालायत जाणार

दरम्यान, मंत्री नाईक यांनी वन्यप्राणी पाळल्याची कबुली दिल्यानंतर आता एकनाथ शिंदेंची शिवसेना नाईक यांच्याविरोधात आक्रमक झाली आहे. वन्यजीव पाळणं कायद्यानं गुन्हा आहे. त्यामुळे त्यांच्यावर कारवाई व्हावी अशी मागणी करत शिंदेसेना न्यायलयात धाव घेणार आहे. त्यामुळे नाईकांचं मंत्रिपद धोक्यात येण्याची शक्यता असून त्यासाठी शिवसेनेने प्लॅन केल्याचं दिसत आहे.