विद्यार्थ्यांना भडकवणाऱ्या 'हिंदुस्थानी भाऊ'ला जामीन मंजूर

मुंबई : राज्यात १० वी आणि १२ वीच्या परीक्षा ऑफलाईन ऐवजी ऑनलाईन (Online examination) घेण्यात यावी, या मागणीसाठी काही दिवसापूर्वी विद्यार्थी रस्त्यावर उतरले आणि आंदोलन सुरू केले होते. या विद्यार्थ्यांना आंदोलनासाठी भडकवल्याप्रकरणी हिंदुस्थानी भाऊ (Hindustani Bhau)उर्फ विकास पाठक याला अटक करण्यात आली होती. त्याला जामीन मंजूर करण्यात आला आहे.

दहावी, बारावीच्या परीक्षा ऑफलाईन ऐवजी ऑनलाईन घेण्यात यावी, या मागणीसाठी हिंदुस्थानी भाऊने विद्यार्थ्यांना भडवले असल्याचा आरोप त्याच्यावर आहे. त्याच्या सांगण्यावरुन विद्यार्थ्यांनी नागपूर, मुंबई येथे आंदोलन केले होते. त्याला अटक करण्यात आली होती. (Hindustani Bhau Granted Bail)

त्याला १४ दिवस न्यायालयीन कोठडी सुनावण्यात आली होती. गुरुवारी हिंदुस्थानी भाऊला मुंबई सत्र न्यायालयाने जामीन मंजूर केला आहे. हिंदुस्थानी भाऊच्या वतीने ऍड. अनिकेत निकम यांनी युक्तिवाद केला होता.

धारावीतील हिंसक आंदोलन प्रकरणी त्याला अटक करण्यात आली. बांद्रा महानगर दंडाधिकारी कोर्टाने हिंदुस्तान भाऊचा जामीन अर्ज फेटाळला होता. मुंबईत शालेय शिक्षणमंत्री वर्षा गायकवाड (Varsha Gaikwad)यांच्या घराबाहेर मोठ्या संख्येत विद्यार्थी एकवटले आणि आंदोलन सुरू केले होते. विद्यार्थ्यांच्या या आंदोलनामुळे एकच खळबळ उडाली होती.

सेशन्स कोर्टाकडून त्याला सशर्त जामीन मंजूर करण्यात आला आहे. ३० हजार रुपयांची वैयक्तिक हमी आणि तितक्याच रकमेसह एक किंवा दोन हमीदार देण्याच्या अटीवर सेशन्स कोर्टाने भाऊला जामीन मंजूर केला आहे.

मुंबईसह नागपूर, औरंगाबाद, उस्मानाबाद, पुणे याठिकाणी बोर्डाची ऑफलाईन परीक्षा रद्द करावी यासाठी ३१ जानेवारी रोजी 'हिंदुस्थानी भाऊ' मुळेमोठ्या संख्येने विद्यार्थ्यांनी आंदोलन केलं.

मुंबईत धारावीत शेकडो विद्यार्थी रस्त्यावर उतरले तर नागपूरमध्ये बसची तोडफोड केल्याचंही समोर आलं. 'हिंदुस्थानी भाऊ'च्या आवाहनानंतर ऑफलाईन परीक्षा रद्द करण्यासाठी आम्ही आंदोलनात उतरलो, असं मुंबईत जमलेल्या अनेक विद्यार्थ्यांनी सांगितले होते.