BMC Election : कबुतरांनी बदलली गणितं; BMC निवडणुकीसाठी जैन मुनींकडून नव्या पक्षाची घोषणा, कोणाला फटका बसणार?

BMC Election : आगामी महापालिका निवडणुकीपूर्वी मुंबईच्या राजकीय वर्तुळात आणखी एका पक्षाची एन्ट्री झाली आहे. जैन समाजाने त्यांच्या नव्या राजकीय पक्षाची घोषणा केली आहे. शांतीदूत जणकल्याण पक्ष असे या पक्षाचे नाव असून कबुतर हे चिन्ह घेणार असल्याचे जैन धर्मगुरु निलेशचंद्र विजय यांनी सांगितले.

मुंबईतील कबुतरखाने बंद केल्याने मागील काही दिवसांपासून खाद्य न मिळाल्याने कबुतरांचा भुकेने मृत्यू होत आहे. रस्त्या-रस्त्यांवर मृत कबुतकांचा खच पडलेला दिसत आहे. या मृत कबुतरांच्या आत्म्याच्या शांतीसाठी धर्मसभा आयोजित करण्यात आली होती. यात निलेशचंद्र विजय यांनी ही घोषणा केली.

निलेशचंद्र विजय म्हणाले, जैन समाज हा शांतीप्रिय समाज आहे. सर्वात जास्त टॅक्स भरणारा, सर्वात जास्त हॉस्पिटल उभारणारा, सर्वात जास्त उद्योग उभे करणारा जैन, मारवाडी आणि गुजराती समाज आहे. आता मराठवाड्यात महापूर आला, त्यातही समाजाने मुख्यमंत्री देवेंद्र फडणवीस यांना 2 कोटी रुपयांचा चेक दिला होता.

आता आम्हाला आमचाही पक्ष असावा असे वाटत आहे. ज्याप्रमाणे बाळासाहेब ठाकरे यांनी माता जगदंबेचा आशीर्वाद घेऊन वाघाचे चिन्ह घेऊन शिवसेनेची स्थापना केली, त्याचप्रमाणे शांतीदूत कबुतराचे चिन्ह घेऊन आम्ही शांतीदूत जनकल्याण पक्षाची स्थापना करत आहोत. हे फक्त जैन समाजाचा पक्ष नसेल. यात राजस्थान, मारवाडी, गुजराती असतील ते सर्व एक होऊ. आम्ही महापालिकेसाठी आमचे वाघ उभे करू, अशी घोषणा त्यांनी केली.

कोणाला युतीला फटका बसणार?

नव्या शांतीदूत जनकल्याण पक्षाने त्यांचे उमेदवार उभे केल्यास याचा फटका कोणाला बसणार? असा सवाल विचारला जात आहे. मुंबईत जैन, राजस्थानी, मारवाडी, गुजराती समाजाचे मतदान मोठ्या संख्येने आहे. कबुतरखाने बंद केल्याने हा समाज दुखावला होता. स्थानिक स्वराज्य संस्था निवडणुकीत अगदी 100 मतांवरही निवडणुकीचा निकाल बदलत असतो. आता ही मते कोणाच्या निकालावर परिणाम करणार हे बघणे महत्वाचे ठरणार आहे.