KDMC Politics : महायुतीत वाद! शिंदेंच्या आमदार अन् भाजपच्या स्थायी अध्यक्षामध्ये जुंपली; 'क्रेडिट वॉर' भडकले!

Mahayuti Politics : श्री पिंपळेश्वर मंदिराच्या जागेच्या प्रश्नावरून महायुतीतील भाजप आणि शिंदेंच्या शिवसेनेत रंगलेला श्रेयवाद अद्याप थांबलेला नसतानाच आता मोठागाव रेल्वे उड्डाणपुलाच्या मुद्द्यावरूनही दोन्ही पक्षांमध्ये राजकीय कलगीतुरा रंगण्याची चिन्हे दिसू लागली आहेत.

डोंबिवली पश्चिमेतील मोठागाव येथील एलसी-१ रेल्वे उड्डाणपुलाच्या निविदा प्रक्रियेला गती देण्याची मागणी करत कल्याण ग्रामीणचे आमदार राजेश मोरे यांनी गुरुवारी केडीएमसी आयुक्त अभिनव गोयल यांची भेट घेतली. खासदार डॉ. श्रीकांत शिंदे यांच्या पाठपुराव्यामुळे या पुलाला मंजुरी मिळाल्याचा उल्लेख करत मोरे यांनी निविदा तातडीने काढून काम सुरू करण्याची मागणी केली.

मोरे यांच्या भेटीनंतर काही तासांतच भाजपचे स्थायी समिती सदस्य दिपेश म्हात्रे यांनी प्रसिद्धीपत्रक जारी करत या प्रकल्पासाठी आपण गेल्या पाच वर्षांपासून सातत्याने पाठपुरावा करत असल्याचा दावा केला. सुरुवातीच्या दोन पदरी पुलाऐवजी चार पदरी उड्डाणपूल मंजूर करण्यासाठी शासन आणि रेल्वे प्रशासनाकडे सातत्याने पाठपुरावा केल्याचे त्यांनी नमूद केले. तसेच नुकत्याच झालेल्या मुख्यमंत्री देवेंद्र फडणवीस यांच्या भेटीतही आपण हा विषय उपस्थित केल्याचा उल्लेख त्यांनी केला.

विशेष म्हणजे, निवडणूक आचारसंहितेमुळे निविदा प्रक्रिया रखडल्याचे प्रशासनाकडून सांगितले जात असताना, कोणताही विलंब न करता निविदा काढण्यात यावी, अशी मागणीही म्हात्रे यांनी केली आहे.

मोठागाव, मानकोली, गोपाळनगर, रेतीबंदर आणि डोंबिवली पश्चिम परिसरातील नागरिक अनेक वर्षांपासून या उड्डाणपुलाची प्रतीक्षा करत आहेत. त्यामुळे पुलाच्या कामाला गती देण्याची मागणी सर्वच स्तरांतून होत असली तरी त्याचे श्रेय कोण घेणार, यावरून महायुतीतील घटक पक्षांमध्ये पडद्यामागे चुरस सुरू झाल्याची चर्चा राजकीय वर्तुळात रंगली आहे.