Eknath Shinde : ठाकरेंच्या निरोप समारंभात एकनाथ शिंदे केवळ दोनच वाक्य बोलले; 'उद्धवसाहेब' असा उल्लेख करत म्हणाले...

Mumbai News, 25 Mar : राजकीय आणि वैचारिक मतभेद कितीही टोकाचे असले तरीही समोरच्याविषयी मनामध्ये वैयक्तिक द्वेष न ठेवणे हीच महाराष्ट्राची राजकीय परंपरा आणि संस्कृती आहे. याच संस्कृतीचे दर्शन मंगळवारी विधानपरिषदेत झालं.

निमित्त होतं माजी मुख्यमंत्री उद्धव ठाकरे यांच्यासह विधान परिषदेतील नऊ सदस्यांना निरोप देण्याचं. या निरोपाच्या भाषणात सभागृहात राजकीय कोपरखळ्या आणि शाब्दिक फटकेबाजी पाहायला मिळाली. शिवाय यावेळी अनेकजण भावूक देखील झाल्याचं पाहायला मिळालं.

राज्याचे मुख्यमंत्री देवेंद्र फडणवीस यांनी उद्धव ठाकरेंच्या निरोपाच्या भाषणात बोलताना,"पु.ल. देशपांडे यांची ओळख 'कोट्या'धीश अशी होती. पुलंनंतर मी उद्धव ठाकरे यांना 'कोट्या'धीश म्हणेन," असं म्हणत ठाकरे या सभागृहात पुन्हा आले तर अधिक कोट्या ऐकायला मिळाव्यात, अशी अपेक्षा व्यक्त केली.

त्यानंतर राज्याचे उपमुख्यमंत्री आणि उद्धव ठाकरेंचे एकेकाळचे सहकारी एकनाथ शिंदे यांनी देखील उद्धव ठाकरेंना निरोप दिला आणि राजकीय आयुष्याला खूप शुभेच्छा देखील दिल्या. त्यामुळे मागील काही दिवसांपासून एकमेकांकडे न बघणारे हे नेते आपलं वैर विसरून सभागृहात मनमोकळेपणाने बोलताना पाहायला मिळाले.

विशेष म्हणजे या निरोपाच्या भाषणात एकनाथ शिंदेंनी उद्धव ठाकरेंचा उल्लेख साहेब असा केला. विधानपरिषदेमधील भाषणादरम्यान, एकनाथ शिंदेंनी उद्धव ठाकरे यांचं पहिल्यांदा नाव घेत बोलायला सुरूवात केली. ते म्हणाले, "उद्धव ठाकरेसाहेब निरोप घेत आहेत. त्यांना निरोगी आयुष्य लाभो. त्यांच्या राजकीय आयुष्याला खूप शुभेच्छा."

मात्र, एकनाथ शिंदेंच्या भाषणावेळी उद्धव ठाकरे सभागृहात उपस्थित नव्हते. तर निरोप समारंभाला चांगलं बोलायचं असत. काहीजण सभागृहात पुन्हा भेटतील, काही जण फिल्डवर काम करताना भेटतील, असंही शिंदे म्हणाले.

दरम्यान, माजी मुख्यमंत्री उद्धव ठाकरे, उपसभापती डॉ. नीलम गोऱ्हे, आमदार अमोल मिटकरी, शशिकांत शिंदे, राजेश राठोड, संदीप जोशी, दादाराव केचे, रणजितसिंह विजयसिंह मोहिते-पाटील, संजय केनेकर या विधान परिषदेतील सदस्यांचा कार्यकाळ १३ मे रोजी संपणार आहे.