Mumbai BJP President : ठाकरे बंधूंच्या युतीचा मोठा धसका; महापालिका निवडणुकीच्या तोंडावर मुंबईत भाजप भाकरी फिरवणार?

Mumbai News : दिवाळीनंतर राज्यातील स्थानिक स्वराज्य संस्थेच्या निवडणुकीचे बिगुल वाजणार आहे. मुंबई महापालिका निवडणुकीची घोषणा दिवाळीनंतर होणार आहे. मुंबई महापालिका गेल्या 25 वर्षांपासून एकसंध शिवसेनेच्या ताब्यात होती. आता शिवसेनेत उभी फूट पडल्यानंतर भाजपला सत्ता मिळवण्याची संधी चालून आली आहे. त्यामुळे गेल्या अनेक दिवसापासून भाजपने निवडणुकीचे प्लॅनिंग सुरु केले आहे. त्यातच आता मुंबई भाजपच्या नेतृत्वात आणि कार्यकारिणीत मोठे फेरबदल होण्याची शक्यता आहे. या बदलांमुळे मुंबईच्या राजकारणावर काय परिणाम होणार ? याकडे सर्वांचे लक्ष लागून राहिले आहे.

हिंदी सक्तीच्या विरोधात राज व उद्धव ठाकरे एकत्र आले आहेत. त्यानंतर महापालिका निवडणुकीसाठी मनसे व उद्धव ठाकरे यांची शिवसेना युती करण्याची शक्यता आहे. त्यामुळे भाजपने मुंबई महापालिका निवडणुकीसाठीचे प्लॅनिंग बदलले आहे. त्यामुळेच आता येत्या काळात मुंबई भाजपमध्ये लवकरच मोठे संघटनात्मक बदल होण्याची शक्यता आहे.

येत्या काळात मुंबई भाजपची (BJP) नवीन कार्यकारिणी तयार केली जाणार आहे. त्यात आता आमदारांना सरचिटणीस आणि महामंत्री यांसारखी महत्त्वाची पदे दिली जाणार नाहीत, अशी माहिती सूत्रांनी दिली आहे. या बदलांनुसार, सामान्य कार्यकर्त्यांना संघटनेत अधिक संधी दिली जाणार आहे.

आशिष शेलारांच्या जागी येणार नवे अध्यक्ष?

मुंबई भाजपचे अध्यक्षपद सांस्कृतिक कार्यमंत्री आशिष शेलार (Ashish Shelar) यांच्याकडे आहे. मात्र, आगामी काळात नवीन अध्यक्षाची निवड होण्याची शक्यता वर्तवली जात आहे. मुंबई अध्यक्षपदासाठी आमदार प्रवीण दरेकर आणि अमित साटम यांच्या नावांची चर्चा सुरू आहे. या दोघापैकी एकाची वर्णी लागण्याची शक्यता आहे. त्यामुळे याकडे लक्ष लागले आहे.

भाजपच्या या संभाव्य बदलांमागे संघटनेला अधिक लोकाभिमुख बनवण्याचा आणि सामान्य कार्यकर्त्यांना संघटनेच्या मुख्य प्रवाहात आणण्याचा उद्देश असल्याचे बोलले जात आहे. आमदारांना त्यांच्या मतदारसंघात लक्ष केंद्रित करण्याची संधी मिळावी, तसेच संघटनेतील पदांसाठी नवीन आणि उत्साही नेतृत्वाला वाव मिळावा, हा यामागचा हेतू आहे.

राज्यभरातील भाजपच्या संघटनात्मक निवडणूका पूर्ण झाल्या आहेत. राज्यात मोठ्या प्रमाणात सदस्य नोंदणीचे टार्गेट पूर्ण केल्यानंतर भाजपने बूथ प्रमुख, जिल्हाध्यक्ष यांच्या निवडी पूर्ण केल्या आहेत. त्यासोबतच प्रदेशाध्यक्षपदी रवींद्र चव्हाण यांची नियुक्ती करण्यात आली आहे. त्यात केवळ मुंबई भाजप अध्यक्षपदाची निवडणूक झालेली नाही. त्यामुळे येत्या काळात निवड केली जाणार असल्याची माहिती सूत्राने दिली.