Nitesh Rane On Jarange: "फडणवीसांवर टीका कराल तर गाठ मराठ्यांशी..."; नितेश राणेंचा जरांगे पाटलांना थेट इशारा

Mumbai News: राज्यात गेल्या काही दिवसांपासून मराठा आरक्षणाचा प्रश्न चांगलाच तापला आहे. मनोज जरांगे-पाटील यांनी मराठा आरक्षणासाठी सरकारला 24 डिसेंबरपर्यंतचा अल्टीमेटम दिलेला आहे. सध्या महाराष्ट्रात जरांगे-पाटलांचे झंझावाती दौरे सुरु आहेत. राज्य सरकारने मराठा आरक्षणासंदर्भात ठोस निर्णय घ्यावा, अशी त्यांची मागणी आहे.

लातूरमध्ये बोलताना जरांगे पाटलांनी उपमुख्यमंत्री फडणवीसांवर जोरदार हल्लाबोल केला. "देवेंद्र फडणवीसांनी (Devendra Fadnavis) आताच शहाणं व्हावं, नाहीतर मी सगळं बाहेर काढणार", असा थेट इशारा त्यांनी दिला. मात्र, यावरूनच आता भाजप (BJP) आमदार नितेश राणे आक्रमक झाले आहेत. "मनोज जरांगे यांनी फडणवीसांवर टीका करू नये, अन्यथा त्यांची गाठ मराठ्यांशी आहे", असा थेट इशारा नितेश राणेंनी दिला.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

नितेश राणे नेमकं काय म्हणाले ?

"मनोज जरांगे यांना आधीच स्पष्ट केलं होतं की, फडणवीसांवर तुम्ही टीका कराल तर आम्ही ते सहन करणार नाहीत. तुमच्या डोक्यात नेमकं कोण विष टाकतंय ? तुम्हाला भाषणं कोण लिहून देतंय? याची आम्हाला पुराव्यासहित यादी बाहेर काढावी लागेल. तुम्ही मराठा आरक्षणासंदर्भात बोलत रहाल तर तुमचं स्वागत करू. फडणवीसांनी टिकणारं आरक्षण दिलं होतं. त्यामुळे आता त्यांच्या विरोधात तुम्ही भूमिका घ्याल तर गाठ मराठ्यांशी आहे", असा थेट इशारा राणेंनी मनोज जरांगे (Manoj Jarange) यांना दिला.

दरम्यान, मनोज जरांगे पाटील सध्या लातूर जिल्ह्याच्या दौऱ्यावर आहेत. त्यांनी राज्यातील विविध शहरात जाऊन सभा, मेळावे घेत मराठा आरक्षणासाठी रान उठवलं आहे. त्यामुळे राज्य सरकार मराठा आरक्षणासंदर्भात काय पावलं उचलतं, हे 24 डिसेंबरनंतर कळणार आहेच. मात्र, नितेश राणे (Nitesh Rane) यांच्या टीकेला आता मनोज जरांगे पाटील काय उत्तर देतात, हे पाहणंही महत्वाचं असणार आहे.

(Edited by-Ganesh Thombare)