Eknath Shinde: एकनाथ शिंदेंच्या बैठकीनंतर गिरणी कामगारांना मोठा दिलासा, शेलू वांगणीतील घरांची सक्ती नाहीच, 'ती' अट देखील रद्द

Mumbai News, 11 Jul : गिरणी कामगारांना शेलू, वांगणी येथे घर न देता मुंबईतच घर देण्याबाबत विचार करण्यात आल्याची माहिती मंत्री उदय सामंत यांनी दिली आहे. गिरणी कामगारांच्या घरासंदर्भात विविध संघटनांची उपमुख्यमंत्री एकनाथ शिंदेंसोबत बैठक झाली.

या बैठकीत गिरणी कामगारांना मुंबई परिसरात घरे देण्याबाबतचा निर्णय आणि त्यांना शेलू, वांगणी येथे घरे घेण्याबाबतची सक्ती करण्यात येणार नसल्याचंही सामंत यांनी या बैठकीनंतर सांगितलं.

तर एकनाथ शिंदेंसोबत झालेल्या बैठकीत शेलू, वांगणी येथे घर नाकारणाऱ्यांना घरच दिलं जाणार नाही, ही जाचक अट शासनाच्या जीआरमधून काढून टाकण्यात आल्याची माहिती गिरणी कामगार लढा समितीचे प्रमुख आमदार सचिन अहिर यांनी दिली.

मंत्री उदय सामंत यांनी आझाद मैदानावर गिरणी कामगारांना दिलेल्या आश्वासनानुसार शिंदेंच्या अध्यक्षतेखाली गिरणी कामगारांच्या संघटनांच्या प्रतिनिधींसोबत विधिमंडळात बैठक झाल्याचं सांगितलं. या बैठकीत शेलू येथील घरे घेण्याबाबत गिरणी कामगारांना कुठलीही सक्ती करण्यात आली नाही.

तसंच असा कोणताही निर्णय झालेला नाही. मात्र, याबाबत अपप्रचार केला जात असल्याचं सामंत यांनी म्हटलं. त्यामुळे आता गिरणी कामगारांना मुंबई बाहेर नव्हे तर मुंबई परिसरातच घरे मिळण्याची शक्यता आहे.

शेलू येथे घरे घेण्याची गिरणी कामगारांना सक्ती नसेल शिवाय 2024 मध्ये घर न घेतलेल्या कामगारांचा घराचा दावा संपुष्टात येणार नाही. याबाबत शासन निर्णयातील मुद्दा क्रमांक 17 रद्द करण्याचा निर्णय एकनाथ शिंदे यांनी घेतला आहे. तर गिरणी कामगारांना झोपडपट्टी पुनर्वसन प्रकल्पात घरे मिळवून देण्यासाठी कोटा निर्माण करण्याचा निर्णय घेतला जाईल.

मुंबईतील मिठागरांच्या जागांवर गिरणी कामगारांच्या घरांसाठी जागा मिळावी अशी केंद्र सरकारकडे विनंती करण्यात येत असून या कामगारांना न्याय देण्याचा राज्य सरकारचा प्रयत्न असून आजच्या बैठकीत गिरणी कामगारांच्या हितासाठीचे निर्णय घेतल्याचं सामंत यांनी सांगितलं.