Thane MNS Protest : ठाण्यात मनसेच्या उमेदवारांचे अर्ज बाद, अविनाश जाधवांनी घेतला मोठा निर्णय; निवडणूक अधिकाऱ्यांचे टेन्शन वाढणार!

राहुल क्षीरसागर

Avinash Jadhav News : ठाणे महानगरपालिकेच्या निवडणुकीसाठी उमेदवारांनी दाखल केलेल्या अर्जाची छाननी आज (ता.३१ डिसेंबर) रोजी पार पडली. या अर्जाच्या छाननीत वागळे इस्टेट प्रभागातील प्रभाग क मधील मनसेच्या उमेदवार प्राची घाडगे तसेच अन्य प्रभाग क्रमांक १६ व १७ मधील अपक्ष उमेदवारांचे अर्ज अवैध ठरवण्यात आले.

निवडणुक निर्णय अधिकारी वृषाली पाटील यांनी पक्षपातीपणे अन्यायकारकरित्या अर्ज अवैध ठरवले, असा आरोप मनसेसह अन्य उमेदवारांनी केला आहेत. याविरोधात आज (गुरुवारी) संबधित निवडणुक कार्यालयात मनसे नेते अविनाश जाधव हे अर्ज बाद झालेल्या उमेदवारांसमवेत आमरण उपोषणाला बसणार आहेत.

ठाणे महानगरपालिकेच्या निवडणुकीसाठी मनसेसह सर्वच इच्छुक उमेदवारांनी मंगळवारी शेवटच्या दिवशी आपापले उमेदवारी अर्ज दाखल केले. ठाण्यात मनसेकडून एकुण २८ उमेदवारांनी अर्ज दाखल केले आहेत. या दाखल अर्जाची छाननी प्रक्रिया बुधवारी संबंधित निवडणुक कार्यालयामध्ये पार पडली. वागळे इस्टेट प्रभाग क्रमांक १६, १७ व १८ या प्रभागांमधील उमेदवारी अर्जाची छाननी निवडणुक निर्णय अधिकारी वृषाली पाटील यांच्या अधिपत्याखाली करण्यात आली.

यावेळी निवडणूक निर्णय अधिकारी वृषाली पाटील यांनी त्यांच्या अधिकाराचा गैरवापर करून सत्ताधारी पक्षातील उमेदवारांचे अर्ज गंभीर त्रुटी असून देखील बाद केले नाहीत. मात्र, मनसेसह विरोधी पक्षातील आणि काही अपक्ष उमेदवारांचे अर्ज अवैध ठरवले आहेत. वृषाली पाटील ह्या अधिकाऱ्याची ही वर्तणुक अन्यायकारक आणि पक्षपाती दिसून आल्याचा आरोप उमेदवारांनी केला आहे.

त्यांच्या या बेकायदेशीर कृत्याविरोधात संविधानाचे रक्षण करण्यासाठी मनसे जिल्हाध्यक्ष अविनाश जाधव यांनी उमेदवारांच्यासोबत गुरुवारी वागळे इस्टेट निवडणूक निर्णय अधिकारी कार्यालयामध्ये आमरण उपोषणाला बसणार असल्याचा इशारा दिला आहे.