Sanjay Raut : 'इम्पोर्टेड माल' म्हटलं यात महिलांचा अपमान कुठे? राऊतांकडून सावंताची पाठराखण तर भाजपवर हल्लाबोल

Mumbai News, 02 Oct : शिवसेना (उद्धव ठाकरे) पक्षाचे नेते अरविंद सावंत (Arvind Sawant) यांनी मुंबादेवी विधानसभा मतदारसंघातील भाजपच्या उमेदवार शायना एन. सी. यांच्याबाबात बोलताना, 'या मतदारसंघात इम्पोर्टेड माल नहीं चलेगा, ओरिजनल चलेगा', असं वक्तव्य केलं होतं.

सावंत यांच्या वक्तव्यानंतर राज्यातील राजकारण चांगलंच तापलं आहे. तर शायना एन. सी (Shaina NC) यांनी सावंतांनी आपला माल असा उल्लेख केला असून हा महिलांचा अपमान असल्याचं म्हटलं आहे.

या प्रकरणी खासदार अरविंद सावंत महिलांची माफी मागणी अशी मागणी करत त्यांनी नागपाडा पोलिस स्टेशनमध्ये तक्रार देखील दाखल केली आहे. या प्रकरणावर अनेक नेत्यांकडून वेगवेगळ्या प्रतिक्रिया येत असतानाच आता ठाकरे गटाचे खासदार संजय राऊत (Sanjay Raut) यांनी सावंत यांची पाठराखण केली आहे.

महिलांचा अपमान कुठे?

शिवाय अरविंद सावंत (Arvind Sawant) एक जबाबदार नेते असून त्यांनी चुकीचं वक्तव्य केलं नसल्याचंही राऊत यांनी म्हटलं आहे. पत्रकारांनी या प्रकरणाशी संबंधित प्रश्न विचारला असता राऊत म्हणाले, "या वक्तव्यामुळे कोणताही अपमान झाला नाही. सावंत आमचे एक जबाबदार आणि वयस्कर नेते आहेत.

त्यांनी म्हटलं की, 'भाजपच्या महिला उमेदवार बाहेरून आल्या आहेत, इम्पोर्टेड माल आहेत', तर त्यात महिलांचा अपमान कुठे आहे? तुम्ही सोनिया गांधी प्रियांका गांधींबाबात काय म्हटलं आहे ते जरा आठवा. भाजप राजकीय स्टंट करत आहे. बाहेरचा माल आहे तर बाहेरचा माल आहे, इम्पोर्टेड आहे.

मतदारसंघाच्या बाहेरचं कोणी लढत असेल तर लोक त्यांना बाहेरून आले आहेत, असं म्हणतात. म्हणजे ते स्थानिक नाहीत एवढंच त्यांनी म्हटलं, त्याचा एवढा मोठा इश्शू करण्याची गरज नाही." अशा शब्दात राऊत यांनी सावंत यांची पाठराखण केली आहे.

अरविंद सावंत हे जबाबदार नेते

दरम्यान, भाजपचे नेते पूर्वी सोनिया गांधी, प्रियांका गांधी यांना इम्पोर्टेड माल बोलायचे. अरविंद सावंत हे जबाबदार नेत आहेत. मुंबादेवीत आयात केलेल्या नेत्यांबद्दल ते बोलत होते. तेव्हा शायना एनसी बाहेरुन आल्या असून त्यांना विरोध होत आहे, असं सावंत यांच्या बोलण्याचा अर्थ होता. ते बोलण्याच्या ओघात काही बोलले असतील. मात्र, निवडणुकीच्या काळात शायना एनसी यांच्याकडून या गोष्टींचे भांडवल केले जात असल्याचंही ते यावेळी म्हणाले.