Mumbai Gangster Murder : मुंबईच्या गुन्हेगारी विश्वात खळबळ उडवणाऱ्या एका धक्कादायक प्रकरणाचा उलगडा झाला आहे. पाच महिन्यांपासून बेपत्ता असलेल्या कुख्यात गँगस्टर रवी बिडलान याची हत्या करून त्याचा मृतदेह ड्रेनेज चेंबरमध्ये लपवून ठेवल्याचे समोर आले आहे.
विशेष म्हणजे आरोपींच्या दारू पार्टीत झालेल्या चर्चेमुळे या खुनाचा पर्दाफाश झाला.
नालासोपारा परिसरातील रवी बिडलान (वय 34) हा जानेवारी महिन्यापासून बेपत्ता होता. त्याच्या नातेवाइकांनी 26 जानेवारी रोजी आचोळे पोलिस (Police) ठाण्यात बेपत्ता झाल्याची तक्रार दाखल केली होती. मात्र अनेक महिने तपास करूनही त्याचा कोणताही ठावठिकाणा लागत नव्हता.
दरम्यान, एका दारू पार्टीत रवी बिडलानच्या हत्येबाबत चर्चा झाल्याची माहिती त्याच्या पत्नीपर्यंत पोहोचली. आरोपींनी हत्या (Crime) कशी केली आणि मृतदेह कुठे लपवला याबाबत पार्टीत उघडपणे चर्चा झाल्याचे समजताच तिने तातडीने पोलिसांशी संपर्क साधला.
या माहितीच्या आधारे आचोळे पोलिसांनी नालासोपाऱ्यातील वैतिवाडी परिसरात शोधमोहीम हाती घेतली. तपासादरम्यान एका ड्रेनेज चेंबरमध्ये मानवी सांगाडा आढळून आला. घटनास्थळी काही कपडेही सापडले असून ते रवी बिडलानचे असल्याची ओळख त्याच्या पत्नीने पटवून दिली.
पोलिसांच्या प्राथमिक तपासानुसार, 15 जानेवारी रोजी रवी बिडलान याच्यावर दगड आणि धारदार शस्त्रांनी हल्ला करून त्याची हत्या करण्यात आली. त्यानंतर पुरावे नष्ट करण्याच्या उद्देशाने मृतदेह ड्रेनेज चेंबरमध्ये टाकण्यात आला. सांगाडा रवीचाच असल्याचा संशय व्यक्त केला जात असला तरी डीएनए आणि इतर वैज्ञानिक तपासणीनंतरच अंतिम पुष्टी होणार आहे.
या प्रकरणी आचोळे पोलिसांनी पाच जणांविरोधात खुनाचा गुन्हा दाखल केला आहे. सुमित आझाद सालासार उर्फ ‘बा’ याला अटक करण्यात आली असून रोहन संजय जगदाळे उर्फ ‘टायगर’ याच्यासह अन्य चार संशयितांना पोलिसांनी ताब्यात घेतले आहे.
वरिष्ठ पोलिस निरीक्षक सुजितकुमार पवार यांनी दिलेल्या माहितीनुसार, आरोपींनी चौकशीदरम्यान हत्या करून मृतदेह ड्रेनेज चेंबरमध्ये टाकल्याची कबुली दिली आहे. मात्र हत्येमागील नेमके कारण काय होते आणि या कटाचा मुख्य सूत्रधार कोण होता, याचा सखोल तपास सुरू आहे.
दरम्यान, रवी बिडलान हा पोलिसांच्या नोंदीतील सराईत गुन्हेगार होता. त्याच्याविरोधात खुनाचा प्रयत्न, खंडणी, दरोडा, लूटमार, बलात्कार, बेकायदेशीर शस्त्र बाळगणे आणि मारहाण यांसह डझनभर गंभीर गुन्हे दाखल होते. गेल्या वर्षी त्याला पाच जिल्ह्यांतून तडीपारही करण्यात आले होते.
दारूच्या पार्टीत रंगलेल्या चर्चेमुळे उघडकीस आलेल्या या हत्याकांडामुळे मुंबई आणि उपनगरांतील गुन्हेगारी विश्वात एकच खळबळ उडाली असून या प्रकरणातील पुढील तपासाकडे सर्वांचे लक्ष लागले आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.