मुंबई : गानसम्राज्ञी, भारतरत्न लता मंगेशकर (lata mangeshkar) यांच्या निधनानंतर महाविकास आघाडी सरकार व भाजप यांच्यात स्मारकावरून एकीकडे वाद पेटला असताना आता मुंबई विद्यापीठाच्या निर्णयावरून नवा वाद समोर आला आहे.
खुद्द मंगेशकर कुटुंबीयांनीच याबद्दल नाराजी व्यक्त केली आहे. लता मंगेशकर यांच्या कुटुंबीयांनी मुंबई विद्यापीठाचे कुलगुरू डॉक्टर सुहास पेडणेकर (suhash Pednekar) यांना पत्र लिहिलं आहे.
लता मंगेशकर यांच्या नावाने अध्यासन केंद्र सुरू करण्याचा निर्णय मुंबई विद्यापीठाने घेतला आहे. या निर्णयावर मंगेशकर कुटुबीयांनी मुंबई विद्यापीठाचे कुलगुरू डॉक्टर सुहास पेडणेकर यांच्या कारभारावर तीव्र आक्षेप घेतला आहे.
सुहास पेडणकर यांनी घेतलेल्या परस्पर निर्णयावर मंगेशकर कुटुंबीयांनी नाराजी व्यक्त करत पत्र पाठवले आहे. मंगेशकर कुटुंबीयांना विश्वासात न घेता निर्णय घेऊ नये, असे पेडणेकर यांना लिहिलेल्या पत्रात म्हटलं आहे.
राज्य सरकारने लता मंगेशकर हयात असताना त्यांच्या इच्छेनुसार मास्टर दीनानाथ मंगेशकर आंतरराष्ट्रीय शासकीय संगीत महाविद्यालय स्थापन करण्यासाठी मंगेशकर कुटुंबातील सदस्य आणि संगीत क्षेत्रातील तज्ज्ञ यांची समिती स्थापन केली होती. या समितीच्या शिफारसी नुसार मुंबई विद्यापीठातील जागा पाहणी करून निश्चित करण्यात आली होती.
मात्र, मुंबई विद्यापीठाने समितीने सुचवलेली जागा लतादीदींच्या हयातीत उपलब्ध करून न दिल्यामुळे मंगेशकर कुटुंबीयांचे स्वप्नं त्यांच्या हयातीत पूर्ण होऊ शकले नाही, याचा खेद वाटत असल्याचं मंगेशकर कुटुंबीयांनी या पत्रात नमुद केले आहे. त्यामुळे मंगेशकर कुटुंबीयांनी मुंबई विद्यापीठाचे कुलगुरू सुहास पेडणेकर यांच्या कारभारावर तीव्र आक्षेप नोंदवला.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.
