Nana Patekar : "एक महिला आपलं घरदार"; हुंड्याच्या वक्तव्यावर करुणा शर्मांची नाना पाटेकरांवर टीका

Nana Patekar News : अभिनेते नाना पाटेकर यांना त्यांच्या एका पोस्टवरून करुणा शर्मा यांच्या टीकेला सामोरे जावे लागले आहे. "जशी पोटगी कायदेशीर आहे त्याचप्रमाणे हुंडा देखील कायदेशीर व्हायला पाहिजे". अशी पोस्ट नाना पाटेकर यांनी केली ती आपण बघितल्याचे करुणा शर्मा म्हणाल्या. याच पोस्टवरुन करुणा मुंडे यांनी नाना पाटेकर यांचा समाचार घेतला. माध्यमांशी संवाद साधताना त्या बोलत होत्या. यावेळी त्यांनी माजी मंत्री धनंजय मुंडे यांनी केलेल्या आव्हान याचिकेवरही माहिती दिली.

करुणा शर्मा म्हणाल्या, नाना पाटेकर साहेबांची एक पोस्ट मी बघितली. ज्यात त्यांनी म्हंटलं की, जशी पोटगी कायदेशीर आहे त्याप्रमाणे हुंडाही कायदेशीर व्हायला पाहिजे. त्यावर त्यांना मी एकच सांगते की, नाना भाऊ महिलांची एक व्यथा असते. एक महिला आपलं पूर्ण घर कुटुंब सोडून आपलं अस्तित्व विसरून एका पुरुषाचं अस्तित्व निर्माण करते.

त्यानंतर तो पुरुष तिला रोडवर सोडतो, ते ही दोन मुल बाळ झालेले असताना. मग सांगा ती महिला कुठे जाणार, पोटगी नाही मागणार? खर्च नाही मागणार तर काय करणार? त्याच्यावर तुम्ही भाष्य करत आहात. हुंडा कायदेशीर का व्हायला पाहिजे? एक स्त्री नसती तर पुरुषाची निर्मिती झाली नसती असेही मत त्यांनी व्यक्त केले.

धनंजय मुंडे यांनी दाखल केलेल्या पोटगी प्रकरणाच्या आव्हान याचिकेवरील माहिती देताना शर्मा म्हणाल्या, 29 तारखेला अंतिम सुनावणी होणार आहे. आम्ही 29 तारखेला न्यायालयात युक्तिवाद करणार आहोत. हा मॅटर अर्जंट असल्यामुळे ही सुनावणी 29 तारखेला ठेवली आहे. कोर्टाने मला दोन लाख रुपये मेंटनन्स दिला आहे. मात्र, तेवढ्यावर मी समाधानी नाही.

आम्हाला कमीत कमी 15 लाख रुपये मिळावेत अशी मागणी आम्ही न्यायालयात केली होती. त्यामुळे आम्ही पुन्हा एकदा याचिका दाखल करणार आहोत. आता कमीत कमी वाढवून 9 लाख रुपये देण्यात यावेत. तसेच आमचा कोर्टाचा खर्च 25 लाख रुपये झालेला आहे. ते देखील आम्हाला द्यावा, अशी मागणी आम्ही केली आहे.