नाना पटोलेंना पोलिसांनी अडवले ; वारकऱ्यांचा आंदोलनात सहभाग

मुंबई : पंतप्रधान नरेंद्र मोदी यांच्या विधानाच्यावरुन कॉग्रेस-भाजप वाद पेटला आहे. विरोधीपक्षनेते देवेंद्र फडणवीस यांच्या सागर बंगल्याबाहेर कॉग्रेसने आंदोलनाची हाक दिली आहे. आंदोलन करण्यासाठी फडणवीसांच्या बंगल्याकडे जात असताना कॅाग्रेसचे प्रदेशाध्यक्ष नाना पटोले यांना रस्त्यात पोलिसांनी अडवले. सुरक्षतेच्या कारणामुळे त्यांना अडविण्यात आले असल्याचे पोलिसांनी सांगितले. कॉग्रेसच्या आंदोलनात वारकरी सहभागी झाले आहे.

मलबार परिसरात सुरु असलेल्या या आंदोलनात भाजप-कॉग्रेसच्या कार्यकर्त्यांची धरपकड सुरु आहे. अतुल लोंढे यांना पोलिसांनी ताब्यात घेतले आहे. भाजपचे नेते गोपाळ शेट्टींना यांनाही पोलिसांनी अडविले आहे. आंदोलनामुळे मलबार हिल परिसरात वाहतुक कोंडी झाली आहे.

पंतप्रधान नरेंद्र मोदी यांनी केलेल्या महाराष्ट्राबाबत केलेल्या विधानाच्या निषेधार्थ आज विरोधी पक्षनेते देवेंद्र फडणवीस (Devendra Fadnavis) यांच्या बंगल्यासमोर आंदोलन करण्याची इशारा कॅाग्रेसचे प्रदेशाध्यक्ष नाना पटोले यांनी दिला आहे. त्यावरुन भाजप नेते प्रसाद लाड (Prasad Lad) यांनी पटोलेंचा एकेरी भाषेत उल्लेख करत बंगल्यासमोर येवूनच दाखव, तुमच्या आंदोलनाला जशास तसे उत्तर देऊ असा इशारा दिला आहे.

विरोधी पक्षनेते देवेंद्र फडणवीस (Devendra Fadnavis) यांच्या मुंबईतील सागर बंगल्यासमोर आंदोलनाचा इशारा नाना पटोले (Nana Patole) यांनी दिला होता. या पार्श्वभूमीवर कॉग्रेस आणि भाजपमध्ये वाद चिघळण्याचा शक्यता आहे. परिसरात पोलिस बंदोबस्त वाढविण्यात आला आहे.

''पंतप्रधान नरेंद्र मोदी यांनी महाराष्ट्राची माफी मागावी,'' अशी मागणी करत काँग्रेसनं आंदोलन करण्याची तयारी केली आहे. मलबार हिल येथील विरोधीपक्ष नेते देवेंद्र फडणवीस यांच्या सागर बंगल्याबाहेर पोलिसांचा कडेकोट बंदोबस्त तैनात करण्यात आला. काँग्रेसचे आंदोलक फडणवीस यांच्या घराच्या परिसरात पोहोचू नयेत याची काळजी पोलिसांनी घेत नेपेन्सी रोड येथे काँग्रेस आंदोलकांना अडवत याच ठिकाणी आंदोलन करण्याची परवानगी दिली.

काँग्रेसला आंदोलनाची परवानगी देता मग आम्हाला का नाही? असा सवाल भाजप आमदार प्रसाद लाड यांनी पोलिसांना केल्यानंतर पोलिसांनी भाजपला ही शांततेत आंदोलन करा, अशी परवानगी दिल्याची माहिती आहे. काँग्रेस आणि भाजप कार्यकर्ते हे आंदोलन करतांना समोरासमोर येऊ नयेत, याची काळजी पोलिसांनी घेत ही परवानगी दिली. काँग्रेसचे आंदोलन नेपेन्सी रोडला रोखण्याची तयारी पोलिसांनी केली तर त्याच्याविरुद्ध दिशेला असलेल्या रस्त्याच्या एक किमी अंतरावर भाजप कार्यकर्त्यांना जमण्याची परवानगी देण्यात आली. ''शांततेत आंदोलन करा," असे आवाहन पोलिसांनी केले आहे. नाना पटोले यांच्या सुरक्षतेत वाढ करण्यात आली आहे.