Sada Sarvankar : शिंदे गटाचे आमदार सदा सरवणकरांच्या अडचणी संपेनात; आता न्यायाधीशही संतापले

Mumbai News: शिवसेना (शिंदे गट) आमदार सदा सरवणकर यांच्या अडचणीत पुन्हा एकदा वाढ होण्याची शक्यता आहे. २००५ साली नारायण राणे यांची सभा उधळून लावल्याप्रकरणाची केस सध्या न्यायालयात सुरू आहे.

नारायण राणे यांनी शिवसेना सोडल्यानंतर सभा घेतली होती. त्यावेळी त्यांच्या सभेत झालेल्या गोंधळाप्रकरणी आमदार सदा सरवणकर, अनिल परब, बाळा नांदगावकर यांच्यासह इतर काही नेत्यांवर गुन्हा दाखल झाला होता.

आता या प्रकरणाची न्यायालयात सुनावणी सुरू असून या सुनावणीदरम्यान यातील काही जणच न्यायालयात हजर होते. इतर काही जण मात्र गैरहजर होते. तर आमदार सदा सरवणकर यांनी न्यायालयात फक्त हजेरी लावली आणि ते निघून गेले.

त्यामुळे न्यायाधीशांनी त्यांना खडेबोल सुनावत संताप व्यक्त केला. तसेच या प्रकारामुळे न्यायालयाने नाराजीही व्यक्त केली. याबाबत सरवणकरांना न्यायालयाने नोटीसही बजावली आहे.

दरम्यान, काही दिवसांपूर्वी सदा सरवणकर यांच्या विरोधात शस्त्रास्त्र कायद्याअंतर्गत गुन्हा दाखल झाला होता. त्यांनी शस्त्राचा वापर बेकायदेशीर पद्धतीने केला असल्याचा आरोपही त्यांच्यावर झाला.

एवढंच नव्हे तर हे प्रकरण विधानसभेतही गाजलं. त्यानंतर आता नारायण राणे यांच्या २००५ सालच्या सभेतील गोंधळ प्रकरणामुळे न्यायालयाने नोटीस बजावल्याचे वृत्त समोर येत आहे. त्यामुळे सदा सरवणकर यांच्या अडचणी मात्र, संपताना दिसत नाहीत.

(Edited By Ganesh Thombare)