NCP MLA Disqualification Case: शिवसेनेनंतर आता राष्ट्रवादीचा फैसला? राहुल नार्वेकर 'या' तारखेपर्यंत निकाल देणार

Mumbai News: गेल्या काही दिवसांपासून विधानसभा अध्यक्ष राहुल नार्वेकर यांच्यासमोर राष्ट्रवादी काँग्रेस पक्षाच्या आमदार अपात्रता प्रकरणाची सुनावणी सुरु होती. ही सुनावणी अखेर बुधवारी संपली. यानंतर आता राष्ट्रवादीच्या दोन्ही गटाला शुक्रवारपर्यंत अंतिम लेखी म्हणणे मांडण्याचे निर्देश देण्यात आले आहेत. राष्ट्रवादीच्या दोन्ही गटाने आपले लेखी म्हणणे मांडल्यानंतर या प्रकरणावर विधानसभा अध्यक्ष 15 फेब्रुवारीपर्यंत कधीही निकाल देण्याची शक्यता आहे. (NCP MLA Disqualification Case)

राष्ट्रवादी काँग्रेसमध्ये फूट पडल्यानंतर राहुल नार्वेकर यांच्यासमोर आमदार अपात्रता प्रकरणाची सुनावणी सुरु होती. मात्र, विधानसभा अध्यक्षांनी आमदार अपात्रता प्रकरणाचा निर्णय लवकरात लवकर घ्यावा, यासाठी राष्ट्रवादीच्या शरद पवार गटाने याचिका दाखल केली होती. त्यानंतर 30 जानेवारीची तारीख देण्यात आली होती. पण विधानसभा अध्यक्षांनी सुनावणीसाठी सुप्रीम कोर्टाकडे मुदतवाढ मागितली होती. त्यानंतर 15 फेब्रुवारीपर्यंत मुदत वाढ देण्यात आली होती.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

यानंतर राष्ट्रवादी काँग्रेसच्या शरद पवार गट आणि अजित पवार गट अशा दोन्ही बाजूचा युक्तिवाद विधानसभा अध्यक्षांनी ऐकून घेतला. सुनावणीवेळी दोन्ही बाजूच्यावतीने जोरदार युक्तिवाद करण्यात आला. अखेर या प्रकरणाची सुनावणी बुधवारी संपली. आता दोन्ही गटाला अंतिम लेखी म्हणणे मांडण्याचे निर्देश देण्यात आले आहेत.

दोन्ही गटाकडून लेखी म्हणणे मांडण्यात आल्यानंतर विधानसभा अध्यक्ष राहुल नार्वेकर हे 15 फेब्रुवारीपर्यंत कधीही निकाल देऊ शकतात. दरम्यान, शिवसेना आमदार अपात्रता प्रकरणाच्या निकालानंतर विधानसभा अध्यक्ष नार्वेकर हे आता राष्ट्रवादी काँग्रेसच्या आमदार अपात्रता प्रकरणाचा निकाल देणार असल्यामुळे या निकालाकडे संपूर्ण राज्याचं लक्ष असणार आहे.

(Edited By-Ganesh Thombare)