Sanjay Shirsat : नरहरी झिरवळांची मंत्रालयाच्या जाळीवर उडी, मुख्यमंत्र्यांचा शिलेदार म्हणाले, 'फक्त बातमी होईल...'

Sanjay Shirsat News : मुख्यमंत्री एकनाथ शिंदे यांच्याशी चर्चा निष्फळ झाल्यानंतर आणि धनगर समाजाला आदिवासींमधून आरक्षणाला विरोधासाठी नरहरी झिरवाळ यांच्यासह काही आदिवासी आमदारांनी थेट मंत्रालयाच्या जाळीवर उडी मारली. त्यामुळे एकच खळबळ उडाली. झिरवळांच्या आंदोलनावर मुख्यमंत्री एकनाथ शिंदे यांचे विश्वासू आमदार संजय शिरसाट यांनी प्रतिक्रिया दिली आहे.

संजय शिरसाट म्हणाले, 'झिरवळसाहेब हे मोठ्या पक्षाचे नेते आहेत. त्यांना मुख्यमंत्र्यांच्या भेटीपासून कोणी रोखू शकत नाही. पण आंदोलन करून बातमी होऊ शकते पण निर्णय होऊ शकतो का? हे पाहणं महत्त्वाचे असते'

झिरवळसाहेब हे घटनात्मकपदावर आहेत. ते विधानसभेचे उपाध्यक्ष आहेत. त्यांनी पदावर असताना असे आंदोलन करणे योग्य नसल्याचे देखील संजय शिरसाट म्हणाले. पदावरील व्यक्तीने असू करू नये, असे देखील शिरसाट यांनी ठासून सांगितले.

मंत्रालयाच्या जाळीवर उड्या मारल्यानंतर मंत्रालयातच सर्वपक्षीय आमदारांनी ठिय्या आंदोलन केले. नरहरी झिरवळ यांच्यासोबत आमदार राजेश पाटील, आमदार सुनील भुसारा, भाजप खासदार हेमंत सावरा यांनी मंत्रालयातील संरक्षण जाळीवर उड्या घेतल्या.

झिरवळांच्या मानेला दुखापत

नरहरी झिरवळ हे यांच्यासह आमदारांनी मंत्रायातील जाळीवर उडी घेतल्याने पोलिसांनी त्यांना सुरक्षित बाहेर काढले. यावेळी झिरवळ यांचा बीपी वाढला होता. ते आंदोलन करताना त्यांच्या भोवती डाॅक्टरांचे पथक देखील होते. नरहरी झिरवळ यांच्या मानेला देखील दुखापत झाल्याची माहिती आहे.