Sanjay Raut : "विचारांशी बेईमानी..."; राज ठाकरे अन् एकनाथ शिंदेंच्या भेटीवर उद्धव ठाकरेंच्या शिवसेनेची पहिली प्रतिक्रिया

Mumbai News, 19 Feb : महाराष्ट्र नवनिर्माण सेनेचे अध्यक्ष राज ठाकरे यांनी बुधवारी (ता.१८) उपमुख्यमंत्री एकनाथ शिंदे यांच्या नंदनवन या शासकीय निवासस्थानी जाऊन भेट घेतली. या भेटीमुळे राज्याच्या राजकारणात विविध चर्चांना उधाण आलं आहे.

कारण नुकत्याच झालेल्या महानगरपालिकेच्या निवडणुकीत एकनाथ शिंदेंची शिवसेना आणि मनसे एकमेकांविरोधात लढले होते. महत्त्वांचं म्हणजे राज ठाकरे आणि उद्धव ठाकरे हे या निवडणुकीत युतीत होते. त्यामुळे राज यांनी एकनाथ शिंदेंची भेट घेतल्यामुळे विविध तर्क वितर्क लावले जात आहेत.

अशातच आता राज ठाकरे आणि शिंदेंच्या भेटीवर ठाकरेंच्या शिवसेनेचे खासदार संजय राऊत यांनी प्रतिक्रिया दिली आहे. पत्रकारांनी राज आणि शिंदेंच्या भेटीवर प्रश्न विचारताच संजय राऊत म्हणाले, "ते का भेटले हे तुम्ही राज ठाकरेंना विचारा आम्ही त्यांची हेरगिरी करत नाही.

कोण कुणाला भेटतं त्यावर बंधनं नाही. एकनाथ शिंदे या प्रवृत्तीवरून आमचं टोकाचं भांडण आहे. कारण शिंदेंनी बाळासाहेब ठाकरेंच्या शिवसेनेच्या पाठीत खंजीर खुपसला. बाळासाहेबांच्या विचारांशी बेईमानी केली. त्यामागे पंतप्रधान नरेंद्र मोदी, केंद्रीय गृहमंत्री अमित शाह यांचा विचार आहे. शिंदेंचं हे नंदनवन बेईमानीतून निर्माण झालेलं आहे."

दरम्यान, राज ठाकरेंच्या भेटीनंतर एकनाथ शिंदेंनी आपल्या एक्सवर एक पोस्ट शेअर केली आहे. ज्यामध्ये त्यांनी लिहिलं की, 'महाराष्ट्र नवनिर्माण सेनेचे अध्यक्ष राज ठाकरे यांनी आज नंदनवन या शासकीय निवासस्थानी सदिच्छा भेट घेतली. यावेळी त्यांच्यासोबत विविध विषयावर चर्चा झाली.

तसेच नंदनवन या बंगल्याच्या हेरिटेज वास्तूचे वेगळेपण जपत केलेल्या सुधारणांचे त्यांनी विशेष कौतुक केले. या बंगल्यात लावलेल्या मुंबईतील जुन्या हेरिटेज वास्तूंच्या फोटो फ्रेम्सची त्यांनी बारकाईने पाहणी केली, आणि जुन्या मुंबईच्या आठवणींना उजाळा दिला.'