Raj Thackeray : मराठीच्या मुद्यावर ठाकरे बंधू एकत्र आले. पाच जुलैला वरळीच्या डोममध्ये झालेला विजय मिळावा यासाठी निमित्त ठरला. मात्र, ठाकरे बंधू एकत्र येण्याच्या हालचाली तीन महिन्यापूर्वीच सुरू झाल्या होत्या. विधासभेत शिवसेना उद्धव बाळासाहेब ठाकरे आणि मनसे दोघांनाही सपाटून मार खावा लागला. त्यामुळे दोघांच्याही अस्तित्वाचा प्रश्न निर्माण झाला होता. त्यामुळे ठाकरे बंधुंच्या युतीची चर्चा सुरू झाली.
राज ठाकरेंनी एका मुलाखतीमध्ये युतीसाठी हात पुढे केला.तर, जाहीर कार्यक्रमातून उद्धव ठाकरेंनी त्याला सकारात्मक प्रतिसाद दिला. दोघा भावांमध्ये चर्चा सुरू झाली मात्र, महाविकास आघाडीसोडून राज यांच्यासोबत जायचे की नाही याविषयी शिवसेना उद्धव बाळासाहेब ठाकरे पक्षातील नेत्यांमध्ये एकमत होत नव्हते.
राज ठाकरेंनी उद्धव ठाकरेंसोबत जाण्यासाठी फक्त महापालिका निवडणुकीचा विचार करून एकत्र यायला नको. एकत्र यायचे असेल तर जिल्हा परिषद, विधासभा आणि लोकसभा निवडणुकीचा विचार करून एकत्र येऊ, अशी अट घातल्याची चर्चा आहे. आणि त्या अटीला उद्धव ठाकरेंनी सकारात्मक प्रतिसाद दिला. त्यामुळे ठाकरे बंधू एकत्र येऊ शकले, अशी राजकीय वर्तुळात चर्चा आहे.
उद्धव ठाकरेंनी विजयी मेळाव्यातील भाषणात एकत्र राहण्यासाठी एकत्रित आलो आहोत, असे स्पष्टपणे सांगितले. याचा अर्थ ते फक्त महापालिका निवडणुकीचा विचार करून राज ठाकरेंच्यासोबत गेलेले नाहीत. तर, मनसेच्या युतीसोबत पुढील राजकारण करण्याचा धोरण त्यांचे आहे.
महापालिका निवडणुकीत मराठी मुद्दा आणि दोघे ठाकरे बंधू एकत्र आल्याचा फायदा होण्याची शक्यता आहे. पण भाजपला टक्कर द्यायची असेल तर फक्त महापालिकेतील युतीवर थांबून चालणार नाही तर पुढील विधासभा, लोकसभेच्या दृष्टिने आत्तापासून मोर्चेबांधणी करण्यासाठी मनसेला सोबत घेतले पाहिजे, असा मानणारा देखील एक गट शिवसेना उद्धव बाळासाहेब ठाकरे पक्षात आहे.
विधानसभा निवडणुकीनंतर महाविकास आघाडी सक्रिय असल्याचे दिसत नाही. लोकसभा निवडणुकीनंतर जी ऐकी त्यांच्यात दिसत होती. ती विधानसभेच्या निवडणुकीनंतर दिसत नाही. राज ठाकरे उद्धव ठाकरेंच्यासोबत आल्याने काँग्रेसने त्यांच्यापासून अंतर राखले आहे. त्यामुळे उद्धव ठाकरे महाविकास आघाडीतून बाहेर पडतील, अशी शक्यता वर्तवली जात आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.