Nalaspora assembly Result : विनोद तावडेंवर पैसे वाटपाचा आरोप असलेल्या मतदारसंघात धक्कादायक निकाल

संदीप पंडित

Nalaspora assembly Result : निवडणुकीपूर्वी राज्याच्या नकाशावर आलेल्या नालासोपारा मतदार संघात बविआला मोठा धक्का बसला आहे. तीन वेळा आमदार राहिलेल्या क्षितिज ठाकूर याना पराभवाला सामोरे जावे लागले आहे. याठिकाणी भाजपच्या राजन नाईक यांनी क्षितिज ठाकूर यांचा 30 हजार मतांनी पराभव केला

नालासोपारा मतदारसंघ हा निवडणुकीच्या एक दिवस आधी चर्चेत आला होता. येथे भाजपचे नेते विनोद तावडे विरारमधील हाॅटेलमध्ये कार्यकर्त्यांसोबत असताना त्यांना बविआच्या कार्यकर्त्यांनी घेरले होते. तावडे यांच्यावर पैसे वाटपाचा आरोप करण्यात आला होता.

महाराष्ट्र विधानसभा निवडणूक निकाल Latest Update

भाजप आणि बविआच्या कार्यकर्त्यांमध्ये निकालाच्या दिवशी वाद होण्याची शक्यता लक्षात घेऊन चोख पोलिस बंदोबस्त ठेवण्यात आला होता. मतमोजणी केंद्रात जाण्यासाठी पोलिसांचे 3 अडथळे पार करून जावे लागत होते.

बविआच्या पराभवासाठी प्रामुख्याने विवांत हॉटेलमध्ये झालेला राडा,नगरसेवकांचे दुर्लक्ष आणि निवडणुकीपूर्वी माजी महापौर राजीव पाटील यांची नाराजी भोवल्याची चर्चा आहे. यापूर्वी 2014 च्या निवडणुकीत राजन नाईक हे क्षितिज ठाकूर यांच्या विरोधात निवडणूक लढले होते त्यावेळी त्यांचा पराभव झाला होता.

महाराष्ट्र विधानसभा निवडणूक निकाल Latest Update

निकालावर प्रतिक्रिया देताना क्षितिज ठाकूर यांनी नालासोपारा मतदारसंघात झालेला पराभव मान्य आहे. हा जनतेचा कौल स्वीकारला असून पुन्हा नव्या जोमाने काम करायला सुरुवात करणार असल्याचे म्हटले आहे.

राजन नाईक म्हणाले, हा विजय माझा नसून महायुती आहे. महायुतीचे विकासाचे व्हिजन घेऊन मी काम करणार आहे. माझा कोणावरही राग नसून आता विकासाचे काम करण्यावर भर देणार आहे

राजन नाईक 1 लाख 30 हजार 465

⁠क्षितिज ठाकूर 1 लाख 316

⁠संदीप पांडे 11 हजार 435