आव्हाड अन् ठाकूरांनंतर सुहास कांदेच्या मतदानावर आक्षेप; भाजप निवडणूक आयोगाकडे जाणार

मुंबई : राज्यसभा निवडणुकीत (Rajya Sabha Election) राष्ट्रवादीचे नेते जितेंद्र आव्हाड (Jitendra Awhad), काँग्रेसच्या मंत्री यशोमती ठाकूर (Yashomati Thakur) यांच्यानंतर आता शिवसेनेतील सुहास कांदे यांच्या मतदानावर भाजपने आक्षेप घेतला. पण निवडणूक निर्णय अधिकाऱ्यांनी हे आक्षेप फेटाळून लावले आहेत. (Rajya Sabha Election 2022 News)

निवडणूक अधिकाऱ्यांच्या निर्णयावर भाजपकडून केंद्रीय निवडणूक आयोगाकडे धाव घेण्याची तयारी केली जात असल्याचे समजते. कांदे यांनी आपली मतपत्रिका राष्ट्रवादी काँग्रेसच्या प्रतिनिधीला दाखवल्याचा आक्षेप भाजपने नोंदवला होता. पण अधिकाऱ्यांनी हा आक्षेप फेटाळून लावला आहे.

भाजपकडून याविरोधा केंद्रीय आयोगाकडे धाव घेतल्यास आघाडीच्या अडचणी वाढू शकतात. दरम्यान, जितेंद्र आव्हाड यांनी मतदान केल्यानंतर थेट जयंत पाटील यांच्या हातात मतपत्रिका दिली, तर अशाच प्रकारे यशोमती ठाकूर यांनी नाना पटोले यांच्या हातात मतपत्रिका दिली, त्यामुळे भाजपचे आमदार आशिष शेलार आणि पराग अळवणी यांनी यावर हरकत घेतली आहे.

मतपत्रिका दाखवायची असते, ती हाताळायला द्यायची नसते, असा निवडणुकीचा नियम आहे. त्यामुळे ही दोन्ही मते बाद करावी, अशी मागणी भाजपने केली आहे. दुसरीकडे शिवसेनेचे आमदार, पर्यटनमंत्री आदित्य ठाकरे यांना दिलेल्या मतपत्रिकेवर निवडणूक आयोगाचा शिक्का नव्हता. त्यामुळे त्यांना मतपत्रिका बदलून देण्यात आली. त्यानंतर आदित्य ठाकरे यांनी मतदान केलं. शिक्का नसलेली मतपत्रिका कशी आली, असा प्रश्न उपस्थित करण्यात आला आहे. भाजपने घेतलेले सर्व आक्षेप महाविकास आघाडीच्या नेत्यांनी फेटाळले आहेत.

दिलीप मोहिते पाटील यांची नाराजी पक्षश्रेष्ठींनी दूर केल्याने त्यांनी मतदान केले आहे, मात्र अण्णा बनसोडे यांनी मतदान केले नसल्याचे समजते. राष्ट्रवादीचे आमदार बनसोडे मुंबईत आहेत, मात्र विधान भवनात नाहीत. तब्येत ठीक नसल्याने बनसोडे विधान भवनात आले नसल्याचा दावा राष्ट्रवादी काँग्रेसने केला आहे.