अखेर सचिन वाझेची सही झाली! आता थेटच देशमुखांशी सामना

मुंबई : मुंबईचे तत्काली पोलीस आयुक्त परमबीर सिंग यांनी आरोप केलेल्या शंभर कोटींच्या वसुली प्रकरणातील मुख्य आरोपी सचिन वाझे आता माजी गृहमंत्री अनिल देशमुख यांना थेटच भिडणार आहे. त्याने मंगळवारी न्यायालयात हजर राहत याबाबतच्या कागदपत्रांवर स्वाक्षरी केली. त्यामुळे आता वाझे हा अधिकृतपणे माफीचा साक्षीदार बनला आहे. (Sachin Waze Latest Marathi News)

वाझे माफीचा साक्षीदार झाल्यानंतर सेंट्रल ब्युरो ऑफ इन्व्हेस्टिगेशनने (CBI) आरोपपत्र दाखल केलं असून त्यात अनिल देशमुख यांना प्रमुख आरोपी दाखवण्यात आले आहे. या प्रकरणात सचिन वाझे सहआरोपी आहे. त्यानेच माफीचा साक्षीदार होण्यासाठी मुंबई सत्र न्यायालयातील विशेष सीबीआय न्यायालयाकडे अर्ज केला होता. सीबीआयनेही त्याला हिरवा कंदील दाखवल्यानंतर मागील आठवड्यात न्यायालयानेही मंजूरी दिली होती. (Anil Deshmukh Latest Marathi News)

सचिन वाझेच्या माफीच्या साक्षीदार होण्याला हरकत घेणारी कुंदन शिंदेंची याचिका न्यायालयाने फेटाळली. त्यानंतर मंगळऴारी (७ जून) झालेल्या सुनावणीवेळी माफीचा साक्षीदार होण्याबाबतच्या सर्व प्रक्रियांची पूर्तता करण्यात आली. वाझेनं सर्व कागदपत्रांवर स्वाक्षरी केली. न्यायाधीश डी.पी. शिंगाडे यांनी वाझेला माफीचा साक्षीदार होण्यासाठीच्या अटी व शर्तींची माहिती दिली.

सचिन वाझेचा जामीनासाठी अर्ज

सचिन वाझेनं माफीचा साक्षीदार झाल्यानंतर जामीनासाठी अर्ज केला आहे. त्यावर न्यायालयाने सीबीआयला उत्तर देण्याचे निर्देश देत जामीनावरील सुनावणी 20 जूनपर्यंत तहकूब केली. तसेच संजीव पालांडे यांनीही आरोपपत्र तांत्रिकदृष्ट्या अपूर्ण असल्याचा दावा करत जामीनासाठी अर्ज केला आहे. त्यावरही 20 तारखेला सुनावणी होणार आहे.

दरम्यान, 100 कोटी वसुली प्रकरणी अनिल देशमुख यांच्या अडचणीत वाढ होण्याची शक्यता नाकारता येत नाही. कारण देशमुख यांच्याविरोधात सीबीआयने एकूण 59 पानांचे आरोपपत्र दाखल केले आहे. यात देशमुख यांना प्रमुख आरोपी दाखवण्यात आले आहे तर त्यांचे खाजगी सचिव संजीव पालांडे आणि कुंदन शिंदे यांना सहआरोपी दाखवण्यात आले आहे.