Sanjay Raut : "फेकूचंद मुख्यमंत्र्यांवर कोण विश्वास ठेवणार, ते...", राऊतांचं शिंदेंना प्रत्युत्तर

अभिषेक घोसाळकर यांच्या हत्येमागे तिसऱ्या व्यक्तीचा हात नाही ना? अशी शंका शिवसेना ( ठाकरे गट ) पक्षप्रमुख उद्धव ठाकरे ( Uddhav Thackeray ) यांनी व्यक्त केली होती. या विधानावर मुख्यमंत्री एकनाथ शिंदें यांनी भाष्य केलं होतं. "सीआयडी, क्राईम पेट्रोल पाहून उद्धव ठाकरे यांच्यात करमचंद जासूस अवरतरला आहे," अशी टीका मुख्यमंत्र्यांनी केली होती. आता शिवसेना ( ठाकरे गट ) खासदार संजय राऊत यांनी मुख्यमंत्री शिंदे यांना 'फेकूचंद' म्हणत प्रत्युत्तर दिलं आहे.

"मुख्यमंत्र्यांनी उद्धव ठाकरेंना करमचंद जासूस म्हटलं. पण, या फेकूचंद मुख्यमंत्र्यांवर कोण विश्वास ठेवणार. ते गुंडांचे सरदार आहेत. तसेच, चोरांची टोळी ते चालवतात. त्यांचं चोरमंडळ असून त्याचे सरदार फेकूचंद आहेत. करमचंद जासूसनं देशात चांगलं काम केलं आहे," असा हल्लाबोल संजय राऊतांनी मुख्यमंत्र्यांवर ( Sanjay Raut ) केला आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

"मुख्यमंत्र्यांबरोबर खंडणीखोर, चोर, बलात्कारी, खुनी असतात"

"रोज चार गुडांबरोबर बैठका घेऊन बुद्धीचे दरवाजे उघडत नाहीत. महाराष्ट्राच्या मुख्यमंत्र्यांबरोबर लेखक, साहित्यिक, कवी आम्ही पाहिले आहेत. पण, आताच्या मुख्यमंत्र्यांबरोबर खंडणीखोर, चोर, बलात्कारी, अपहरकर्ते, खुनी असल्यामुळे त्यांना आसपास सगळेच करमचंद दिसत आहेत. तुरूंगात असायला पाहिजे असणारे लोक मुख्यमंत्र्यांबरोबर दिसत आहेत. उद्धव ठाकरेंचं छायाचित्र कलेत जागतिक नाव आहे. मुख्यमंत्र्यांचं कशात नाव आहे?" असा खोचक सवालही राऊतांनी उपस्थित केला.

"...अन्यथा गुंड महाराष्ट्रात हौदोस घालतील"

"महाराष्ट्रात कायदा आणि सुव्यवस्थेवर लक्ष द्यायला हवं. मुख्यमंत्री आणि गृहमंत्र्यांना राज्य सांभाळणं कठीण झालं आहे. कारण, राज्याचा गुंडांनी ताबा घेतला आहे. त्यामुळे महाराष्ट्रात राष्ट्रपती राजवट लावून विधानसभा बरखास्त करावी. अन्यथा गुंड महाराष्ट्रात हौदोस घालतील. महाराष्ट्रातील सरकारच्या गुंडगिरीविरोधात कोणतं आंदोलन करावं, काय पाऊलं उचलावीत, याबद्दल महाविकास आघाडीत चर्चा सुरू आहे," असं संजय राऊतांनी सांगितलं.