Sanjay Raut ..हो चिखलफेक करणार, दसरा मेळाव्याआधी संजय राऊत काय म्हणाले त्याचीच जास्त चर्चा

Dussehra Melava Shivaji Park : मुंबईत आज दोन्ही शिवसेनेचे दसरा मेळावा होत असून वेगवेगळ्या ठिकाणी हे मेळावे आयोजित करण्यात आले आहे. उद्धव ठाकरे काय बोलतात याकडं सर्वांचे लक्ष लागून आहे. त्यापूर्वी खासदार संजय राऊत यांनी केलेल्या विधानाचीच जास्त चर्चा रंगली आहे.

राज्याला अतिवृष्टीचा फटका बसला आहे. मुंबईतही मोठा पाऊस झाला असून शिवसेना उद्धव बाळासाहेब ठाकरे शिवसेनेच्या दसरा मेळाव्याच्या ठिकाणी दादर येथील शिवतीर्थावर पाण्याने चिखल झाला आहे. शिवसेनेकडून पाणी काढण्याचे व चिखल कमी करण्याचे काम सुरु आहे. अशात शिवसेना शिंदे गटाने उबाठा गटाला डिवचलं आहे. तसेही उद्धव ठाकरे यांच्या दसऱ्या मेळाव्यातून केवळ चिखलफेक होते असा टोला शिंदे गटाने लगावला आहे.

मात्र त्यावर संजय राऊत यांनी शिंदे गटाला जोरदार प्रत्युत्तर दिलं आहे. राऊत म्हणाले, हो..चिखल फेकणार आहोत. चिखल फेकायला पाहिजे. आपल्या हिंदू संस्कृतीत अनेक सण चिखलाशी संबंधीत आहे. शिमगा असेल, विदर्भातही असे काही सण आहेत. या मेळाव्यावर टीका करणाऱ्यांना (शिंदे गटाला) हिंदू संस्कृतीच माहिती नाही. शिवतीर्थावरील चिखलात अशा गद्दारांना लोळवावेच लागेल. पाकिस्तानसोबत क्रिकेट खेळणाऱ्यांचे समर्थन करणाऱ्यांवर चिखल फेकलाच पाहीजे असा हल्लाबोल राऊतांनी केला.

नरेंद्र मोदी सत्तेत आल्यापासून त्यांनी नवीन परंपरा सुरु केली. ती परंपरा म्हणजे गद्दारांचे मेळावे. आधी निष्ठावंताचे मेळावे होत होते. मात्र आता भाजप मोदी व शहा यांच्या प्रेरणेतून गद्दारांचे सुद्धा मेळावे व्हायला लागले आहेत. मग आता या गद्दारांच्या मेळाव्यावर चिखल नाही फेकायचा तर मग काय करायचं? असा सवाल राऊतांनी उपस्थित केला. या गद्दारांना मोदी-शहांचे पाठबळ असून त्यांच्या मदतीनेच त्यांनी शिवसेना चोरल्याचा आरोप राऊतांनी केला.

शिवतीर्थावरील चिखल हे काही आमच्या समोरील आव्हान नाही. आव्हान असते तर आम्ही चिखलात गेलोच नसतो. आज राज्याच्या कानाकोपऱ्यातून शिवसैनिक मुंबईत दाखल होतो आहे. निष्ठावंत शिवसैनिक उन, वारा, पाऊस, वादळं कशाचीची पर्वा न करता चिखल तुडवीत येतील आणि विचारांचे सोने घेऊन जातील. संध्याकाळी तुम्ही पाहा काय नजारा आहे तो असं राऊत म्हणाले.